Imprescj pe ScueleCurte

Cemût si disial par talian… ce saio… vuarzenon? O cogume? O panarie? O furducje? Anzit… ma ce dal diaul ise une furducje? O ancjemò, un calabrone, par furlan, ce isal? E il mirtillo? Ise una glasigne o une cirignicule? E il scriç, sino propite sigûrs che al sedi il scricciolo?

Ce fastidi, vere? Cuant che no si à un dizionari a puartade di man e no si à nancje tante passion di lâ on line a cirî di disberdeâ i dubis. Il probleme al è il timp… o sin simpri di premure, di presse… o volin fâ dut ae svelte.

E alore?

E alore nus covente un imprest SVELT!

Une app veloce e rapide, che nus gjavi i dubis intun marilamp e cun snait. Da rest, il telefonut al covente propite a chest. E alore cjalait chest reclam ca, tal câs che no lu vedis ancjemò viodût:

In sumis… scjamait SVELT app ene che o podês! E tigneitlu li, sul telefonut, a puartade di dêt.

E chest al è dome l’ultin rivât de famee dai nestris jutoris e compagns di viaç par furlan, che a podìn judâus a scrivi lis contis dilunc de ScueleCurte.

E za che o sin us visin dut ce che o podês cjatâ sul sît dal DIZIONARI FURLAN.

Bon, tant par tacâ o cjatâis propite il DIZIONARI DE LENGHE FURLANE, in homepage, che al à la particolaritât, e us al vin za contât, no dome di spiegâ il significât di une peraule furlane (par furlan) ma ancje di mostrâ cemût che i autôrs de lenghe furlane le àn doprade intes lôr oparis e tai lôr scrits. E juste par dî, al pues capitâus ancje di cjatâ cualchi autôr di Contecurte o adiriture l’Ostîr.

Ma se il Dizionari de lenghe furlane al è facil di doprâ pai furlans di raze, magari cualchidun al è dal forest o al sta imparant la lenghe e i covente alc che al dopri une lenghe veicolâr come il talina. Nuie pôre. Sul sît o cjatâis il DIZIONARI TALIAN FURLAN e il DIZIONARI FURLAN-TALIAN che a rivin a distrigâ ogni dubi e ancje a dâ profonditât al vuestri lessic, insiorantlu.

Juste par fâ un esempli, cjalait, par cjatâ il verp just che magari o savês dome par talian.

E simpri sul sît dal dizionari o cjatais ancje il FORMARI, par viodi lis declinazions di ogni peraule, soredut dai verps, e il CORETÔR ORTOGRAFIC, par mendâ il grues dai vuestris scrits del faloputis di grafie.

Ma se o volês invezit passâ il timp e divertîsi, une altre App di scjamâ in bande di chestis dôs, e je SBORF, che no stin nancje a spiegâus ce che al è. Fracait, scjamâit, cirêt e gjoldêt.

1 comment