La acuile e la mari

Une femine plene e cjaminave par un troi de mont, cuant che une grande acuile e jere rivade su la crete denant di jê. La femine si fermà, scaturide. La acuile le cjalà e i domandà: “Parcè sêstu cussì spauride, mari umane?”
La femine e cjalà jù viers il sô grim e lu gafà cun fuarce: “Parcè che il gno frut al è pront a nassi, e mi domandi simpri se o sarai une buine mari. O volarès protezilu di dut, evitâ il so dolôr e fâi la vite plui facile”.
La acuile e restà cidine par cualchi moment. E rispuindè: “Cuant che i miei piçui a nassin, il nît al è dut ce che a cognossin. Là a cjatin il clip, la mangjative e la protezion. Par lôr al è il puest plui sigûr dal mont. Ma e rive une dì che chel nît al à di jessi bandonât”.
La femine e ingrispà la front: “Parcè àno di bandonâ un lûc sigûr?”
“Parcè che a son nassûts cu lis alis” E rispuindè la acuile. “Un nît al protêç fin che si cres, ma se no si lu lasse mai, al pues deventâ une preson”.
La femine e restà in pinsîr: “Ma jo o soi sô mari, no varessio di impedîi di colâ?”
La acuile le cjalà e i disè: “Imagjine di fâ simpri tu dut al puest di to fi. Risolvi ogni probleme prin che al rivedi a frontâlu. No tu i permetis di fâ erôrs, di pierdi, di cognossi une delusion. Tu crodis di protezilu, ma cemût podaraial imparâ a tirâsi sù se no tu lu lassis mai lâ jù? Cemût aial di imparâ a sielzi se tu decidis simpri par lui? E cemût fasial a capî ce fuart che al è, se tu combatis ogni bataie al so puest?”
La femine si scunì. “No”, e le indevant la acuile, “No tu âs di creâi il dolôr. La vite e cumbine di bessole. Tu âs dome di acetâ che no tu puedis protezilu di dut”.
Po dopo e vierzè lis sôs grandis alis. “Intant che al sarà piçul, al varà bisugne dai tiei braçs. Cuant che nol cognòsla strade, al varà bisugne de tô vuide. Cuant che la colade e sarà masse dure, al varà bisugne dal to jutori. Ma cuant che al sarà grant al varà di imparâ ancje alc di plui dificil. Ce? Imparâ a fâ un pas indaûr, cuant che al covente.”
Chestis peraulis a spaventarin la femine.
“E se al plûf?” i domandà.
“Lassilu che al provi la aghe che e ven dal cîl. Judilu a lâ sù, ma no stâ a improibîi di lâ.”
“E se al piert la strade?”
“Fâi viodi che al pues tornâ indaûr.”
“E se cualchidun al ves di rompi il so cûr?”
“Reste dongje di lui intant che al impare che ancje un cûr ferît al pues vuarî”.
La femine e dubità prin di fâ la ultime domande. “E se un dì no ves di vê plui bisugne di me?”
La acuile le cjalà par un grum di timp. “Alore tu âs fat ben il to lavôr”.
La femine e sintì i siei vôi jemplâsi di lagrimis.
E veve simpri pensât che jessi une buine mari al voleve dî deventâ indispensabil, protetive, risolude, jessi simpri presint.
Ma magari jessi une buine mari al voleve dî ancje preparâ so fi pal dì cuant che al sarès stât bon di frontâ il mont cence tignî la sô man par simpri.
“Ognidun al à di savê alc”, e continuà la acuile. “Un frut nol à di cressi biel pensant che cence la mari no i larà mai ben. Al à di cressi biel savint che sô mari i à insegnât che al pues fâ”. La femine e tacà à ridi e i disè: “Alore o ai di insegnâi a svualâ”.
La acuile e scjassà a planc il cjâf: “No, tu âs di judâlu a scuvierzi che al à za lis alis. E dopo à slargjâlis”.
Un aiar al traviersà il troi e al tirà sù cualchi fuee. Prin di lâ sù, la acuile e disè: “No stâ a fâ simpri ce che il to frut al pues imparâ a fâ di bessôl. No stâ e evitâi ogni erôr. No si à di sielzi simpri par lui. Lasse che al provi, lassilu fâ un erôr, ancje par une volte. E cuant che al varà dibisugne di te, tu tu sarâs li, no par vivi la sô vite al so puest, ma par ricuardâi che al pues fâlu”.
La acuile si alçà tal cîl. La femine e restà a cjalâle fintremai che e deventà un piçul pont jenfri lis monts.
Parcè che magari il compit plui dificil di un gjenitôr nol è chel di tignî dongje un fi par dute la vite, ma chel di amâlu avonde par preparâlu pal dì che al sarà pront a fâ la sô strade. Si à di protezi un fi cuant che al à dibisugne, e vuidâlu intant che al è daur a imparâ.

di Mario Facile
#1902
Conte voltade e ispirade di une conte simboliche cjolte de rêt