CDC08 – Trisculutis

CDC08 – Trisculutis

No mi visi neancje dal parcè che o ai decidût di lâ a cognossi la creature che e vîf dentri dal zardin di Vile Manin.
In paîs a disevin che e jere coçone, che e veve lis çatis di ‘save e un scus di copasse su la schene, sfodrât di caiessis, muscli e scais di pes. Jo o jeri vonde sigure di dulà cjatâle, ma no savevi cemût fâ a jentrâ te Vile di gnot, cence lâ a finîle dai carabinîrs o, piês ancjemò, scufiotade di mê mari, che mi varès sierade in cjase fin ai disevot e forsit ancje di plui.

Ma si sa, cuant che mi met tal cjâf alc, o pochi tant che un roc, fintremai che o rivi a otignî. E cussì, un miercus dal mês di Avrîl, pôc prin di scûr, mi soi platade su la culinute des statuis e o ai spietât che lis stelis, e lis lûs di Passarian, a mi sclarissin i trois e lis ombrenis de Vile. Une volte sierade dentri, soi lade drete li dal piçul lât che al è propite tal mieç dal zardin e o ai tirât fûr des sachetis dal grumâl la mê arme segrete: une lescje che no ameteve faliments… lis trisculis!

E no lis trisculis che si vendin, che a somein maduris, ma che a son dome sglonfis di aghe e concim. Jo o vevi puartât lis trisculutis di bosc, chês piçulis piçulis piçulis, che si cjatin te boschete di Vico Scudiele, dongje de rive dal Cuar, tibiadis dai cjavrûi e becotadis des parussulis. A son trisculis che al pâr che no savedin di nuie, ma dome se lis cerce un di chei consumâts de vite, che a dividin lis zornadis in doi tocs: lavôr e no lavôr, dismenteantsi di vivi.

Se un al sa intivâ i savôrs, invezit, chestis trisculis a san di ogni.
Ma lu à confermât ancje la creature, saltade fûr de aghe cuntun svuacarâ di curiositât, scjassant lis çatis di anfibi e slusorant sot de lune tant che une stradalbe alternative. E jere alte passe trê metris, soi sigure, ma par fortune no si è spauride cuant che mi à viodude.

«Mangjino une par om?», mi à dit movint a pene a pene il bec, e jo, contentone e plene di aghegole, mi soi tirade plui dongje e sintadis a gjambis in crôs o vin mangjât lis trusculis insiemi, tal cidin antîc e frescot de Vile.
«Ve chi, cheste è sa di un zîr in biciclete cui amîs, a sunâ i campanei di Codroip».
«E cheste ca invezit e sa di nêf colade di gnot, intun lunis di chei che no tu âs voie di lâ a scuele, parcè che a ti interoghin in matematiche».
«E cheste… e sa di un toc di pan compagnât al formadi di latarie, intant che tu scoltis tô mari che ti conte di cuant che e jere frute».
«E sint cheste ca, che e à il savôr di un svuarbecjavai blâf e sforadi che ti si poie sul dêt, intun daspomisdì di Istât, cjalt di fâ trimâ l’asfalt».
E triscule dopo triscule, o sin ladis indenant cussì fin a a cognossisi e savê il bon e il biel une di chê altre. O sin deventadis amiis, e amiis par simpri, ancje se di chê volte no si sin plui viodudis.

No sai parcè.
Forsit parcè che o soi cressude, forsit parcè che si vevin dit dut ce che a vevin di dîsi. O sai che jê e vîf ancjemò là, in chê poce an dopo an simpri plui sute. Te vile Manin di gnot no soi plui tornade, ma o sai che cuant che o meni i miei nevôts te boschete di Vico, cumò, no si viodin ni cjavrûi ni parussulis e lis trisculutis, se si lis cjate, no àn plui chei savôrs.

di Vimodrone – peraule clâf: Triscule
#1895