La torate

Cheste storie e scomençà tune buinore clare e lusorose, nancje un nûl al maglave il cîl.

Ducj a vioderin a Tite Sesule vignì ju corint come un danât de torate disore dal Cjistiel. Cuant che Tite, ai 10 di Lui dal ’43 al vignì a cognossince che i aleâts a jerin sbarcjâts di cualchi bande in Sicilie, rapidementri al instalà un osservatori te torate, za che di chê postazion al rivave a viodi da lis monts insin al mâr. Al veve ancje une radio a valvulis che lu tignive informât sul va e ven de facende.

Tite, une volte rivât inte place dal municipi, si viodè circondât di une sdrume di int:
– Su, dai, conte, ce novitâts âstu?
Tite, cui voi difûr e cence flât al rivà dome a dî:
– A rivin, a rivin, a stan rivant!
Al jere il prin a sei maraveât, lui al veve compagnât il lâ indenant dai aleâts a traviers dai comentaris che al sintive cu la sô radio.

Il consei municipâl al decidè che si veve di dâur un benvignût adeguât aes circostancis, za che a vignivin a liberânus dal forest invasôr. Nol è stât facil, a forin dome dacuardi che devant di ducj al veve di sei il sindic cun tant di fasse tricolôr.
In cuatri e cuatri vot si cjatarin sul confin comunâl, spietant la caravane aleade.

E cussì e fo, la caravane e jentrà in paîs al sun de fanfare municipâl, cenglade di bandierutis multicolôrs e batimans sostignûts. I aleats, chei graduâts, si logarin tal Cjistiel e tes miôr vilis. Il paîs si le dismovint di chê sflacje che si puartave dentri di tant timp.

Lis gips, cence polse, a lavin e a vignivin, i siei ocupants, tal mintri, a mastiavin ciunga. La int, a planc si imerzè tai ûs e costums di chescj amîs oltrans. Te fevelade paisane, la peraule okey e veve cjapât pît cun chê fuarce e podê di meti dacuardi a ducj. E une volte vueleâts i cancars, il paîs si sistemà.

Tite Sesule, che al veve simpri cualchi nevodut a man, si entusiasmave contantji lis sôs esperiencis de torate, simpri vivis tai siei ricuarts.

di Galliano di Buenos Aires
#1886