LCPBDM #4.2 – Giulia

Tu sês une di chês frutis che a va indevant a pensâsi frute ancje se aromai frute no tu sês plui. Al sarà parcè che tu sês picinine, di stature, di vôs, di pinsîrs, di anime. Al sarà parcè che par te il mont ator al è simpri stât fat di feminis e par te lis feminis a son dutis frutis. Al sarà parcè che ti plâs propite la peraule “frute”. Che nol è come par un frut, che a ti ti à dât simpri la idee di pome. Frute no, frute e je une peraule plui biele, plene di dolç, cence cjantons, cence pecoi pe lenghe. Une peraule che e finìs cuntune vocâl. E tu tu ti sês simpri sintude cussì. Se lis personis si dividessin in vocâls e consonants, tu tu saressis une vocâl.

Da rest tu ti clamis Giulia, e il to non ti è simpri plasût propite par chel… un non plen di vocâls. E un non che nol plâs dome a ti, tu lu sâs. Al è un non cence pecoi pe lenghe. Un non di doprâ tes cjançons.

Baste pensâ a dutis chês che inte vite ti son capitadis, che ti àn conseât, che ti àn fat scoltâ, crodint magari di fâ scjas o fâti un plasê, che ti saressin plasudis. Ma invezit no. E par solit a jerin oms, sedi chei de cjançon, sedi chei che ta la proponevin, oms che non àn mai capît nuie di te. Ma chest colp no. Chel link di spotify tal à mandât une frute. Une frute che no tu rivis a tignîti lontan, ancje se tu varessis. Parcè che sì, lâ cui amîs, a cjase sô, sô e dal so om… al è un problema, e ti fâs stâ mâl. E no tu varessis nancje di scoltâle chê cjançon.

E invezit… e fevele di te, in ogni note e in ogni peraule. E je la tô cjançon, che juste par une frute come te, la cjançon plui biele dal mont.

UNA LETTERA ALLA PAURA, Simone Panetti, Titolo Provvisorio [2023] 3’16”

La cjante plui biele dal mont e je di un altri che al navighe avonde fûr des modis e che al è vonde fûr cu la cassele. Si clame Simone Panetti, e in chest 2025 al è vignût fûr cuntun disc punk che plui punk no si pues, businant parsore di ghitaris rabiosis che ti petenin ancje i pêi dal nâs. Ma invezit, un pâr di agns indaûr, tal 2023, al veve fat saltâ fûr un disc che nol jere un disc e si clamave, difati, Titolo provvisorio. Al jere plen di tocs che a someavin dome stampons, ideis o un scomençament di cjançon. Dentri però e jere ancje cheste ca, Una lettera alla paura, che e messedave poesie e melodie in maniere pardabon une vore dolce, cence jessi stomeose.