Bramazion di mus no rive in cîl (ma cualchi volte…)

Bramazion di mus no rive in cîl (ma chualchi volte…)

E jere la piês secjarie di cinc agns incà.
Al tacâ dal Istât i meteorolics a anunziavin che “E vignarà une buine cuantitât di ploiis e cun regolaritât, lassant indaûr cuatri stagjons di patiment”.
E lui, pensionât da pôc, al veve cjapât sul seri la idee di ingrandî l’ort. Setante plantutis di pomodoros, un biele grampe di basili e cocis dapardut.
Al lavorave tant che un mus.
E ogni matine si jevave sù e al lave fûr par viodi chel cîl imacolât cence nancje une striche di nûl. Chel stes cîl che tes seris si colorave dut di grîs, tant che al pareve che al stes par lassâ colâ dute la aghe che al veve sparagnade, par daspò sfantâsi vie pe gnot.
Alore si sintive cjapât pal cûl dal Univiers intîr. Ma si diseve: Pazience. E si meteve a vore a sborfâ tant par che lis plantis no lessin a finîle par murî.
Daspò la pression de aghe curint e jere ancje sbassade al minim. E il serbatori al jere simpri sul ôr di svuedâsi. E si diseve: Pazience. O dopri chel pôc di aghe di ploie che o ai tugnût di cont te cisterne di plastiche.
Fin che e jere finide ancje chê. E i dîs a continuavin metintsi i cîi grîs nome par nuie par daspò sclarisi cence lassâ colâ une gote. E si diseve: Pazience.
E la sô femine cun dute la sô buine volontât i molave concets cjapâts di tant lâ atôr di cors di auto scuvierte, auto jutori, costelazions familiârs, e.v.i.
I faseve dî ogni dî “O ringraci l’Univiers par ce che o ai.” e daspò i faseve recitâ il proverbiâl hoponopono al cosmi: scusimi, graciis – trê voltis – lûs benedete – altris 3 voltis.
Fintremai che al jere rivât chel dì che se la ploie no fos rivade nol sarès vanzât plui nuie di mantignî
Chel cricâ dì al jere lât fûr e alçant cun rabie il cjâf viers il cîl clâr, daspò di une ispirazion profonde i veve vosât:
LA PUTA QUE TE PARIÒ!
LA PUTA QUE TE PARIÒ!
LA PUTA QUE TE PARIÒ!*
E al jere tornât in cjase, a metis dal aiar condizionât.
E si jere indurmidît, mieç pe strache e mieç par fastidi.
Viers la une, un sunôr bramât al bateve il veri dal barcon.
E di li, al veve plovût fin miezegnot.