CC24Novembar#21 – Il campionât a 7 m/s²

#21 – Il campionât a 7 m/s²

Tu ju ricognossis subit i lunarûi, di cemût che a cjaminin. Tal imprin tu ju viodis stracs, malsacodâts, che si movin cjalant insù e dapardut cun chê ande un pôc maraveade e rabiose.
Ma chest al dure pôc. A cjapin fuarce cul passâ dai minûts, e cu la fuarce a cjapin ancje coragjo.
Sul cjamp, dopo, a corin di no crodi. Tu ju viodis zetâ e sghirlâ, 15 puntins colôr di arint che a ‘siminin cence padin.
Cheste partide e je impuartante, soredut par nô che dôs setemanis indaûr o vin propit batût la lune cuintri dal Base 4B… dopo o vin vinçût, eh, ma ce fature!
Tu che tu âs cualchi an in plui forsit tu pensis che o feveledi di balon. No. Il balon al esist ancjemò, ma al è dai agns ‘30 che la int si è come stufade. A disin che al è plen di bausiis e fraudis.
Al è stât cu la Grande Espansion Spaziâl dai agns ‘50 che la Comission intercontinentâl e à creât Bongi, un zûc pensât par tignî dongje i abitants des coloniis. Che no son famôs par jessi contents e che si lamentin che chei de Tiere a varessin di mandâ plui risorsis compensativis e tratâju miôr.
Il campionât al covente ancje par formâ un sens di comunance. Par chest nô de Tiere o vin spindût beçons pai cjamps di zûc cun gravitât interne a 7 m/s², un valôr decidût par vignî incuintri a ducj (prin di dut a nô… ma no stâ a fâ il pesemoscjis).
Tornant ae partide Tiere – Lune. I 30 zuiadôrs a corin svelts come rochetis, lis scjalinadis dal stadi a son dutis blu e arint. Come ai toi timps, sport e politiche a van simpri insiemi, e si viôt dai slogan dai tifôs: Tiere lare, tu paiarâs dut!, o: Tiere ingorde, ti mangje la Lune!
E, come ai tiei timps, tal stadi al sucêt di dut. Al minût 33, propit intant che Giacconi si svicinave al zei Est, un lunarûl al à sbarât cuintri de curve blu. No je la prime volte, si sa che i lunarûi a son salvadis. Un ferît, un ooo corâl di maravee. Il lunarûl lu an puartât vie e sul cjamp i Blu a àn tacât a cori plui fuart di prime, segnant 4 voltis di file! O vin batût la Lune, par 13 a 11!

di Margarite Cogi (Glorious Grene)
#1816