CC24Dicembar#16 – Ce frêt

#16 – Ce frêt

E cuanch’al mierle
al à perdût la vous
pa’ la val
ce freit.

Al è aiar, usgnot e si sint cetant che al al cor jù par liberâsi tes planis largjis, lontanis. Un aiar che al cîr di pôl a vencjâr, di vencjâr a pôl e po ta ogni sgrîf, ogni sfese, ogni mûr. E che nol cjate, parcè che i barcons a son sierâts, i scûrs inclostrâts e la vôs, che e je vôs, no si mostre e e tâs.
E jo, jo o soi achì denant, denant dal nuie che al è restât di te e ce lenghe varessio di doprâ? Ce peraulis?
Tu no tu sês e ce che nol è, il no jessi, nol à peraulis, nol à logos e al è tant che jessi ad ôr di un bûs neri e no savê se al è alc dopo il gloti e se chel alc al sburte par jessî fûr e nol rive. Tu sburtaressistu? Tu, di chê altre bande, sintistu ancje tu il vueit, sêstu ancje tu la lûs che no passe, il lavri sierât? O pensistu che al sedi stât avonde? Avonde di chê che o clamavin lûs, di chel che o clamavin colôr, di chê che o clamavin libertât?
Ma dut al tâs e tu tu tasis, robe tra lis robis che dal nuie e ven a flôr e tal stes nuie e torne, daûr dal ordin dal timp. Robe tra lis robis che si piert, fûr di une nâf, di un tren, di une fieste che e reste ancje se un vîs al recline e al sparìs daûr di une coltre, di une puarte.
E jo mi visi la strade, la int che si voltave, mi visi la int che ti vignive daûr pa l’istant dal to vîs e par contâlu la sere, in cercli. E jo cun te. E jo cun  te che o provavi il savôr des peraulis e il tocjâsi di  piere e lavri.
Ogni tant o cjati cualchidun che di te si vise e alore o comencìn a fevelâ, ma il nuie al reste e, dopo, mi cjali ator e o viôt che ducj a van come se nol mancjàs alc, come se il vueit nol des fastidi, nol fasès mâl. Come se nol fos. E il mont al reste li, tant che un gjat che si lave.
Robe tra lis robis, tal nuie tornade, daûr dal ordin dal timp, cemût che al è normâl. E jo o soi achì cence une lenghe, une peraule, un blec.
Al è aiar, usgnot e si sint che al cor jù e che al cîr. Ma dut al è muart, distudât e dut al è li. E ce frêt.

di Stiefin Morat (Catine la Nere)
#1833