#14 – Il Circul dai sumiadôrs
Regalâimi il cricâ
di zornadis vivarosis
in chest cjantâ di uciei
come un diluvi.
Trentetrê artistis a jerin stâts convocâts in te sale dal Cafè, par un misteriôs invît.
«Agradîts ospits…», al disè siôr Bertolin, cjarinant il pêl dret sore il barbonçâl tombadiç.
«Usgnot o viodarês alc di straordenari.»
Cun lentece teatrâl al tirâ sù il drap di sede rosse.
«Un orloi?» e domandâ une fantate sudizionose.
«Nol è un cualsisei orloi. Chel culì al segne il destin. Ma, atenzion: ogni desideri al à un presit.»
Carli, un pitôr cun lis mans magladis di colôr, al spacâ l’incjantesim: «Jo o vuei provâ.»
«Une vore ben», al disè siôr Bertolin, intant che i dave l’orloi.
«Siere i voi, pense al to sium e strenç l’orloi.»
Ubidient, Carli, ma, dut a un trat, la so muse si jemplâ di terôr. L’orloi i sbrissâ des mans cuntun rumôr sec.
E ancje lui al colâ cence un suspîr. Muart!
«Al è lât masse oltri», al saltà sù siôr Bertolin, ridint par cont so.
«Cui vuelie provâ cumò?».
Anute, la uniche scritore zovine, e fissave l’orloi cuntune atenzion foreste.
«O provi jo», e disè cun vôs sigure.
I siei pas a pesavin une tonelade.
Cuant che jê e cjapà l’orloi in tes mans, il glaç i veve paralizât i vues.
«Siere i voi e sumie», al indicà Bertolin, cui voi tant che falcets.
«Regalâimi il cricâ di zornadis vivarosis in chest cjantâ di uciei come un diluvi.»
E il Circul dai Sumiadôrs al cambiâ forme.
Tal aiar dome un fin fîl di pôre.
Fûr, il cjampanili al batè miezegnot.
Dentri, l’orloi al lusive ancjemò. Imobil, in spiete.
Di colp, il tic e tac tornâ a scomençâ.
Ma nissun al jere restât a sintilu.
di Stele Alpine
#1831
1 comments On CC24Dicembar#14 – Il circul dai sumiadôrs
Un afâr seri vivi sot di chescj orlois, come chel dal paron de fabriche di tomobils, che lu tignive sul pols de cjamese par misurà il timp di chei altris e no chel par se. Lussian