#10 – L’om e il mâr
Uè ti lei ancimò tal cûr: forsi ‘e jè cheste
l’ore plui clare, l’ùltime, che nus lasse il destìn.
Al si diseve di simpri di vê plui cûr che sintiment e forsit tantis de sôs disgraciis a partivin di chest. Ma tal stes timp, nol rivave a dâsi dal dut la colpe. Cun almancul vot oris a zornade, sîs dîs a setemane, denant dai tocs di compressôrs in fabriche, vot oris di simpri chê e suns tant che clic e clac, nol jere sempliç rivâ a fâ ben te vite. Mot de man, CLIC, mot de man, CLAC. Pierdûts i amîs di simpri, pierdût l’amôr, pierdude fintremai la dignitât a fuarce di piçûi debits, abûs, umiliazions… pierdude, in sumis, la sperance, al lave sù e jù pes stradis di Lignan, tal frêt dal Invier e te solitudin de stagjon basse. Ducj i dîs, daspò des vot oris, al lave a bevi cuatri tais tal bar plui galiot dal paîs, par tornâ a cjase di chel cjôt clupignant a çampe e a drete, a bevisi doi gots di Ballantine’s e a butâsi tal liet, in spiete di tornâ al clic clac. Lis gnots che nol rivave a durmî voli al cirive un bar ancjemò viert par vê ancje un dêt di sgnape, che par solit al comedave la situazion e al finive par clopâ di sium, altris voltis al passave oris a vaî cu le muse sul cussin.
Al cjaminave e cjaminave, tal timp libar, e dutis lis domeniis si svicinave al fâr ros, par cjalâ la aghe, tal scûr de gnot imbrunide o sot dal soreli ingrisît dal brut timp. Grise, verde, bluate, nerate, sporcje: ogni volte al si meteve a pensâ che une nadade viers il nuie e tal profont dal ocean no fos, insom insom, une prospetive cussì grivie se metude dongje dal clic clac e dal liet matrimoniâl par metât vueit. Un biel bagn refrigjerant e, salacor, la sô pene e sarès finide, intune maniere o ta chê altre. E, cussì, te criùre di Dicembar si svicinave simpri di plui al ôr de splaze, dì par dì, e al cjalave il licuit cun insistence cressinte. Intant, dentri di lui, une vôs i murmuiave simpri la stesse naine, che i visave alc let timp indaûr:
«Tu sôs muart tu, fantàt
ad altri no stâ crôdi, tu sôs muart».
di Nonio
#1827
