#04 – La peraula
peraula, plena
za di dut quant
ce ch’al vares det
l’om su la tiera.
Rote, tate, rote in mîl fruçons. Cun tant che le vevis tignude cont, chê tace, adun cun chês altris cinc zimulis! Un regâl di gnocis, no mo? 1939. Metudis in biele mostre inte vitrine. A man çampe jentrant in cjase. E a man drete e jere la vintule. Dute li la mobilie. E ‘cjase’ no jere la cjase, e jere chê cumò si podarès clamâle sale di gustâ. Mangjâ cun gust, vê gust di mangjâ. Oh, mighe robe di haute cuisine! No, mignestre di fasûi, polente e une fete di salam, cuant che e lave ben. Ma, propi par chel, mangjâ cun gust chel pôc. E par bevi tacis di veri grues, che no vedin di rompisi! Chês bielis inte vitrine, dopradis dome intes fiestis grandis, grandononis. Tropis voltis in cincuante agns, sîs? Cuatri?
Cumò une e je rote.
Passadis in ereditât, i zovins di cumò no vuelin vêlis, a disin che a son brutis, cun chê rondele colorade di moron che e parturìs une sorte di caliç svasât, robe di une voltonone.
E alore ce vino fat? Cuatri lis vin poiadis in posizion strategjche, pai fruts cuant che ur ven sêt.
E cumò a àn rot une. E veve 85 agns. E e je rote.
Peraulis bielis si lis cjate, tate, sì. Cjase, vitrine, vintule, gustâ, grandononis, voltonone.
Ma par dî dut il sintiment che al nas fûr di chestis sclesis di veri antîc, o ai sgarfât pardut, ma no lis ai cjatadis lis peraulis justis. Chel grant urli primordiâl al veve pensât a dut. Ma no a une tace di otantecinc agns che e va in fruçons!
di Ippogrifo
#1821
