Il teme pe CorseCurte24 di Otubar

La partide dal secul

«Dai sturnel, sielç il mac».
«Chest ca, cu la acuile su la schene? Vadial ben?»
«Benon… Al è un pieç che no lu doprìn».
«Cui tocjal fâ lis cjartis?»
«A ti ve, çondar! E viot li che al è un Pittino cu la muse par sù».
«Fossial dome chel, ve ca un Camaur e Tubaro… cui che al à metût vie lis cjartis al sarès di cjapâ a scufiots…»
«Viôt che tu lis vevis metudis vie tu, eh»
«Bon… lassin pierdi… alce».
«Un Bodanza! Nol valial come mate?»
«Ce raze di sculât…»
«Eh eh eh!»
«Pôc ce ridi! Jo za o vierç».
«Di prime man?»
«Yes! Un tris di Ba sal della e… un altri tris di Giovanni: Pellis, da Udine e… Tiepolo»
«Eh no, calmìn! Tiepolo al sarès Giovanbattista, mi pâr».
«Mago! Ma Gian al sta par Giovan, quindi il tris al è bon»
«Maladet… Ma jo ti stoi daûr, cjale ca, un tris cun Strussiat, Aita e Campo dall’Orto – land e street art – e par tirâ dongje i ponts che a coventin une scjale di C cun Ceschia, Celiberti e… chest no tu tal spietis: Canci Magnano!»
«E dopo soi jo il sculât! Scarte va… Ah!»
«Putan! Ti coventavie propite chel Popesso! Così non vale!»
«Vale… se mi ven sù ancje chel o sieri!»
«E alore cumò che tu lu âs dit, ti scarti chest Zigaina!»
«E jo chest Pellegrino».
«Da San Daniele?»
«Di Flambri no di sigûr».
«Rît rît batecul, che se o ves di pescjâ un Baldan o sieri jo!»
«Intant jo ti picji chest Marangoni, e tu cjapile tal comedon!»
«Ah! Tu me âs petade ancje chest secul!»
«E ancje cheste volte ti tocje a ti meti vie lis cjartis… E dretis eh!»