CC24Otubar#07 – La buteghe di Pieri Pauli

#07 – La buteghe di Pieri Pauli

Te vecje buteghe di Pieri Pauli, il liutâr, lis polvarosis vitrinis a jerin plenis di struments musicâi dismenteats.
Di gnot, a penis che si distudavin lis lûs de buteghe, i struments a scomençavin a fevelâ tra di lôr.
– O ricuardi biei dîs di glorie – al disève il liût, scûr in muse e cun cualchi cuarde rote, – soredut cuant che mi invidavin cjiscjelants e poetis, lis mês cuardis a vibravin in maniere speciâl.
Il cimbli, cui siei tascj zâi, al suspirave tal dî: – Lis mès dolcis melodiis a jemplavin i salons dai palaçs e sigûr che i rivocs di chei sunôrs a cjaminin ancjemò in chês parets. E a mi, mi reste dome la eco di chei timps.
Un violin baroc al cjapà la peraule: – Lis orchestris no nus vuelin plui, a preferissin struments gnûfs e brilants. Ma nô o vin sveât veris passions.-
Il flaut di len, dolç e zentîl al disè: – Forsit, nol è che o sin stâts dismenteâts, dome che la nestre musiche e à za finit la sô mission.
E cun chest a finirin i cjacareçs de gnotolade.
Dulinvie une gnot une biele musiche e sveà di scjas Pieri Pauli, i pareve che e vignìs de buteghe. Cidin cidin al le viers di jê, rivât che al fo al cjatà dut cuiet, no si sintive nuie, dome i parè che al fos stat fat cualchi spostament. Al tornà te cjamare sô e tal doman, cuant che al sierà la buteghe, al lassà chi e là cualchi spartît musicâl.
Chê gnot lu svearin i prins acuardis di une cognossude Serenade.

di Galliano di Buenos Aires (Fuschi)
#1776

Teme: Giovanni da Udine, particolâr