CC24Setembar#20 – Gote par gote

#20 – Gote par gote 

Le veve pestade, svilide, seviziade, maltratade par agns e agns. I veve poiât spagnolets su la piel, butât scarpis e modons intor, vosât e jemplade di patafs denant dai siei amîs, doprât lis piês violencis, sbregât i siei dissens e spacade la sô robe, supât dut ce che e veve in bancje e mandade a fâsi sfrutâ pes voris plui brutis. Ma cumò al jere leât intun breon e chel sunôr e chê sensazion di umit no lavin plui vie… Lis gotis a levin indevant a colâi su la panze. E no finivin mai, nol rivave a indurmidîsi, cun chel torment cence fin tes orelis e su la piel. I veve dite che e spietave di viodi se la aghe i varès sbusât la piel prime di mandâlu fûr di cjâf, che i varès ancje dât di mangjâ par fâlu lâ indenant. E veve zontât, ancje, che al podeve ancje zigâ, tant la cantine e jere insonorizade. Lu saveve, parcè che le veve insonorizade lui, par pacâle in pâs.
E cussì, gote par gote, il svindic de sô femine si passeve dal so sintiment che si sfantave.

di ?
#1762