CC24Avost#26 – Hikikomori

#26 – Hikikomori

Gno pari e mê mari a son mancjâts a no tant timp un di chel altri.
A jerin avonde vielis, no masse in salût, e nol jere di ce maraveâsi. No pues dî nancje di vê patît plui dal necessari. Soi une semence che no à mai vût masse aghe o atenzions, juste chel tant par no socombi ae rundugne de vite, che simpri ti cres ator. Afiet, braçolasi e buinis peraulis, di bogns furlans, a jerin robe che si sotint, che no à dibisugne di jessi manifestade.
Però, vê i viei vîfs e jere la ultime robe che mi deve un alc cefâ: un viaç in machine par viodi di lôr, un messaç pal telefonut, alc di spese di fâi, chês robis che si vevin di fâ cul smartphone, che lôr no vevin e no varessin mai savût doprâ.
Cumò soi libar.
Dal dut.
O lavori, vere. Voi vie di cjase a siete e torni a sîs di sere. Ma in pratiche no feveli cun nissun. Dal lunis al vinars. Ma la sere no voi fûr. Mai. Sabide e domenie lis passi in cjase. No ai femine o murosis. No ai amîs. Ind ai vûts, clare. Feminis e amîs. Ma a si son sfantâts cul vivi, no sai nancje jo cemût al sucêt. Al sucêt e vonde. Tu rivis a cincuante e tu restis cence.
No voi in glesie, no lei, no scrîf, no hai nissun hobby, no ai ort, no ai una cjase grande, no fâs part di nissune associazion o proloco, no ai nissun interès in alc. O podarès passâ il timp sui social e daûr des seriis tv, ma nancje chel. In medie, mi fasin avonde ingomut e lis eviti.
E pûr il timp al passe. No mi capite mai di provâ la stufe dal vivi, nancje di sabide e domenie. Mangjâ, bevi, durmî e polsâ a son ativitâts che no mi lassin timp par stufâmi. E no soi nancje di chei che a un ciert moment a van a copâsi. Ancje se mi vignìs voie, dutcâs, mi cjaparès masse fadie e mateçs.
In paîs o ai sintût dì che o soi un hikikomori, ma e je une cazade.
Soi dome un furlan, un furlan lassât pustot. E soi une robe rare.
La int, dute le int, voaltris comprendûts, o sês coltâts a sbreghebalon. Un cjamp al è fat di cumieris di timp e voaltris o semenais di dut. Fâ robis e fâ robis e fâ robis… come mats. E lis plantis no cressin ben, si mangjin la salût une cun chê altre.
Jo no. Jo no semeni nuie. O lassi che urtiis, grame, elare, baraçs e compagnie biele e cressi in pâs, dentri di me, su lis mês cumieris di timp.
La pâs dal vivi e je ancje cheste.

di ?
#1741