CC24Avost#09 – Dino Cjacarela

#09 – Dino Cjacarela

Dino!, il gustâ al è pront!
E Dino, cu la cjace cjariade di ciment intune man e il modon ta chê altre, lis mole parsore de linie dal mûr. Ducj a gustavin cidins e svelts a ecezion di lui che al cirive cualsisedi teme par intardâ il moment di tornâ a vore.
Al doprave cetancj argoments par cjapâ l´interès e fâ cori i minûts: politiche, balon, religjon, economie, feminis.
Pene rivât in paîs cun so fradi di doi agns plui zovin a vevin condividût une stanzie. Ma par pôc timp. A jerin di taie compagne, par disgracie dal plui zovin, che si jere stufât di cjatâ simpri dopradis e sporcjis lis sôs cjamesis e i siei bregons.
Dino al svolave jenfri progjets e ideis che a finivin simpri in nuie. Nome une volte cuant che – cuissà parcè che si vantave di vê tacât la scuele tecniche – al veve decidût che il so al jere direzi e cirî clients par so cont.
Ma si lis robis no van indevant e se il paron al comparîs a lis dîs di matine e ancjemò nol si à idee di ce che al à di fâ ognidun…
Il progjet al jere finît ta la prime opare che al veve cjapât: une cjase di lus di regolâ.
Par prin si doveve tornâ a impermeabilizâ un mûr che di dentri al jere il font di un armâr che la siore di cjase e doprave par preservâ pelicis di grant valôr. La prime part, la rassadure dal mûr, e jere stade finide par lis cinc dal vinars. Ore di partî.
“Restin a finîlu” i disè un dai lavorants.
“Nol covente. Par come al va il vint e la temperadure, o soi sigûr che la pression e je alte. Impussibil che al vegni a plovi, almancul fin martars”.
Lunis a buinore, la parone di cjase lu spietave con il cont dai bêçs pierdûts in pelicis esclusivis ireparabilmentri cjapadis dal umit par la plui grande burascje dal an.
Dino al à paiât fin al ultin franc.
So fradi nol podeve crodi ce che al scoltave: “Sâstu Elio? Nol è che o soi pucefadiis, nome che il gno cjâf al funzione in maniere divierse. Jo o vevi di jessi nassût siôr.”

di Zorç Cesaratto (Matungo)
#1724

1 comment