CC24Avost#07 – La decision di Virgjinie

#07 – La decision di Virgjinie

Basili al jere restât vedul in etât madure. Passâts i prins moments di aviliment, si ricuardà di Virgjinie, une morose vude in zoventût. Chest ricuart i puartà une vampade di sperance, cui sa…
Daurman al cjapà la coriere. Rivât devant de cjase di Virgjinie, al cjalà la puarte, il timp le veve fruiade. I bastarin curts moments par ricuardà il vestibul, cuant che si cumiatave di jê.
Al fracà il campanel tossicjant e al de un pas indaûr.
Daspò de seconde scampanelade, Basili al sintì rumôrs di lochet e clostri, la puarte si vierzè, al viodè une anziane che e cirive di botonâsi la vieste e di metisi des forchetis par tignî fer il cocon che i sbrissave.
– Bundì, che mi scusi siore, mi displâs di vêle disturbade, o varès bisugne di fevelâ cun Virgjinie, – i disè Basili dut di un flât.
La anziane lu scuadrà dal cjâf ai pîts e daspò di une sprolungjade polse e disè: – Virgjinie, no, mi displâs, no je plui ca e no crôt che e torni.
Basili, sbassant il cjâf, si voltà e al partì.
Virgjinie e sierà la puarte. La presince di Basili, che jê e veve ricognossût a dispiet dal timp che al jere passât, le veve disturbade.Tignintsi la part de vieste che no jere rivade a botonâ, e murmuiave: – Joisus mari, in ce stât che al le Basili, coçon, cence dincj e cun chê tripe po. Madonute sante, di ce spetacul che mi soi salvade!
Virgjinie e veve cjapade la decision corete, stratignintsi di dîsi in muse dutis chestis robis. La sô creance no i veve permetût di ofindilu.

di Galliano di Buenos Aires (Fuschi)
#1722