Il teme pe CorseCurte24 di Lui

«Durian, salak e rambutan!» al veve vosât denant dal public, stant impins suntune cjadree logade propite denant di una grande terine, vistût di mâc. Chel paiaso di Mohamed i veve tirât i trê ogjets e lui, veloç tant che un samurai, al veve disniçât il curtis e ju veve fats a tocs e scussâts, fasintju saltâ par aiar cu la lame metude di tai e fasint colâ scussis e picjis dapardut e la polpe dentri de terine. «Lulo! Guava! Graviola! Pepino!» E cumò al jere chel paiaso di Cheng che pedalant suntun monociclo i tirave i ogjets e lui, di mestri, al faseve compagn di prin, tacant a jemplâ il contenidôr. Di li al veve tirât fûr une sorte di Hattori Hanzo! Il public, scaturît, al berghelà un Ooohh di maravee… «Cherimoya! Lucuma! Ugli! Sapote e sapodilla!» al vosà a clâr, e cumò al tocjave a Borodianka.
La fantacine, picjade cul cjâf par jù, tignude pai pîts dal so compagn Babukar, a trente metris di altece, i lassâ colâ sul cjâf une grampade di robe e lui… Zac! Zac! Zac! che nancje Goemon Ishikawa XIII… E la terine simpri plui plene. Al saltâ fûr Jorge, il domatôr, che a cavaloto dal Ipopotam i fasè mangjâ dutis lis scussis, intant che il spadacin al berlave:«Kiwano! Litchi! Pomelo! Pitaya! E ancje Granadilla!»
Altre grampade, altri Zac Zac Zac, chest colp cuntune britulute gjavade fûr di un cjalçut e altri Ooohh de int. Terine cuasi plene. Al mancjave dome il plui paiaso di ducj, Mister Smith, il paron, che al jessè cuntun cangûr e fasint fente di gjavâ fûr alc de sô sporte al zontâ: «E alore cjapiti ancje la carambule e lis gjugjulis!» E dopo un ultin Zac Zac, ve che Vigji di Maniago al sierà il so numar, cun tant di strucade di limon e grampe di zucar! «Ladies and gentleman! A voi… la macedonia gourmet!» e jù un batimans di fâ tramâ il tendon. E nie… di cuant che Vigji, il lançadôr di curtis, al veve decidût di deventâ un Chef stelât, la vite intal Circ Internazionâl no jere plui la stesse.
Bon… il numar al plaseve une vore, la int e dave di mat e la macedonie e jere pardabon di lecâsi i dêts.
Ma… no savevin propit trop che a saressin lâts indevant cundut ce che si spindeve a fâ rivâ chês pomis scalembris di ogni bande dal mont!