CC24Lui#21 – Eureka

#21 – Eureka

Cence permès di sielte te lotarie de vite a Eureka i tocjà di colâ intun contest di miserie.
Se ben no i mancjàs mai il nudriment a jerin compagns di strade che ogni dì a saltavin une pitance e a jerin pardabon libars di scugnî lâ.

Par altri il cuartîr dulà che e jere a stâ al someave une sorte di polvariere. Dulà che il miscliç di lenghis e culturis in chê suaze nol jere un valôr zontât, magari cussì no une bariere pe convivence. La scjarsetât e sparniçave la violence che a voltis e faseve di scjampade, une sorte di liberazion pai torments che tant che une pignate a pression a batevin tal cjâf de int. Par piês te contrade in chei timps alì al jere un gjermanic a imponi lis regulis e in mût ruspiôs al meteve sù un decalic messianic par sotanâ il progrès di ducj al so propi interès.
E je cussì che la sô adolessence no fo aghe di rosis, anzit e fasè part di doi conflits une vore pençs che i lassarin une olme par dute la sô vite.

Cul jutori di un grum di amîs e daspò di un secont tentatîf a rivarin meti in bande il todesc. A ben che a paiarin il presit di centenârs di muarts e distruzion a lassarin il cuartîr libar de sô saorne. La sô grinte par liberâ il puest i de la pussibilitât di jessi a cjâf de ricostruzion di chel desert. Subit e cjatà fonts par tirà sù une metropoli multietniche dulà che il progrès al jere pardabon un boom.
Agns daspò, magari cussì no i violents a faserin un altri intent par cjapâ il podê, une sorte manganelade di plomp parsore de armonie. In chest câs, la int dal puest, cumò un vore madure, ur fasè fûr cul pês de leç e e rindè il borc un ferâl par ducj i pais che a jerin ator.
In dì di vuê Eureka e je in pâs, trancuile di lassâ un mont miôr che chel dulà che e jere colade. No cate che e viôt cun preocupazion cierts ategjaments di individualisim che a van cuintri la comunitât.

Precisazions dal autôr:
Cun dut che Eureka al è un personaç di finzion cheste e je une storie pardabon vere.
Eureka e je une citadine di un cuartîr che al à di non Europe.

di Lenart Gjavedon (32)
#1709

2 comments