#16 – Framieç
Come ducj i martars intun suburbi di Buenos Aires, ai 27 di Avrîl dal 1971 un frut al riceveve des mans di so pari il suplement da divulgazion dal gjornâl La Razón. E come ducj i martars il frut al cjalave imagjins e titui, fin che al jere clamât a cene.
In chê volte la cuvierte robà plui timp dal solit.
Finalmentri, si sclarî la sô idee: Europe rapresentade come une regjine: un braç al jere la Italie, chel altri la Danimarcje, il pet lu conformavin “Gallia” e “Germania”, al est une cotule lungje e finive tai Urâi e “Moscovia”.
Cui agns al veve rivât a savê che chê imagjin e jere “Europa Regina” di Johannes Putsch dal 1537.
Par chel frut di nûf agns la realtât e jere chê di ducj i dîs e ancje chê altre: di dulà che si vignive, di une lenghe fevelade fûr di cjase e une altre dentri. Di storiis e mangjativis che “ca a no son ma a jerin cussì e cussà”.
Par simpri i è restade tal cjâf chê imagjin tant che il titul dal fassicul: “Europa: Una vieja Dama Digna” (Europe: Une Vecje Siore Degne).
ll lunis 22 di Lui dal 2024 un om al faseve pulizie da sô biblioteche. Chel che al jere stât chel frut si à cjatât devant di chel fassicul intat. Fer ta la scjatule, a someavin vignî fûr da la stanzie peraulis e storiis che i balavin ator dal cjâf.
Vuere. Emigrâ. Marilenghe. Altre vuere? Paisût. Feudi. L’infier voltât in paradis e la tiere prometude come lungje decjadence. Europe e jere ancje un puest di int che a jerin parincj ma che nol cognosseve.
“Europa Regina” par un sclip e je deventade une brume devant di siei voi, E cu la voglade pierdude si à domandât cui che al sarès stât lui di chê altre bande de aghe se so pari nol ves acetât lis cjartis e il viaç di so fradi “par stâ a vore doi o trê agns in Argjentine”.
di ?
#1704
