CC24Lui#11 – Finibus Terrae

#11 – Finibus Terrae

Canicule, sunôr di milions di cialis in conciert, megawatt di alis che si sfrein fin a rimbambîti. O soi a Sante Marie di Leuche, ai confins dal mont Ocidentâl di une volte, a une spudade de Afriche, li di front. Smicjant chel fuscj, vert e celestin tra aghe e cîl mi si vierzin scansei dal gno vivût. Afriche: Il concors dal “Dado Knorr” dulâ che o podevi vinci une zirafe e mi soi lamentât cun mê mari che il gjalinâr al jere masse bas, ma o vevi prontade une buse sul cuviert e metût vie un cjapielut marcât “Raggio di Sole”, cui bûs pai siei cuaruts. Lis fotos dai “Arditi”dal gno paîs, partîts pe Somalie ai prins dal ‘900 a cirî “un puest a soreli jevât!” Il Rai (sorenon), in pose cul stivâl neri, dopli che al fume, e la bestie sot dal tac. “La mia Africa” viodût al cine Feroviari. Un mît: la Pangea, il principi dal mont: trê tieris gnovis si gjavin fûr dal caos, ma cul timp, come a scacs, il blanc al vinç, il neri al piert, e il zâl al spiete e si mangje dut. Afriche, ma cuale… Lungje e largje, come un omenon dividût in trê. Il cjâf tes miôr civiltâts dal Mediterani ma il cûr tal petroli; là jù insom i pîts sui diamants, su li pomis e sui minerâi, ma tal mieç panze vueide, piel di corean e arsure. Ducj si son tacâts ta chê tete, fin a svinidrile e po scartâle e sassinâle. Par chest, tal gno tacuin, une ricevude di “Save The Children” e berle “vendete e rispiet”! Il cafè di une setemane e un frut al viôt; doi zîrs di Spritz fra amîs e un frut al mangje par un mês. Sot di chel soreli di misdì, jo mi pari cu la limonade, ma là jù no ‘nd è avonde poçs par burî fûr aghe par int e campagne, ma polvar e il vaî silent des maris cu la muart simpri a bracecuel. Scusait, al è plui un lament che une storie, ma no si po simpri sierâ i voi. No stin fâ simpri i turiscj che “ho meditato al suono dei tamburi su un tappeto di pelle di antilope per sentire le vibrazioni selvagge”. Afriche poç di culturis, minorancis, gjenocidis , ignorancis, maraveis di vite che a si distudin, spudâ balins par sorevivi, caritât, emigrazion, sfrutaments.
Se un dî il mont si voltarâ ancje cheste tiere e ridarâ.

di Stiefin Asquini (Siruc)
#1699