CC24Lui#08 – La scrivanie dal re

#08 – La scrivanie dal re

Cuant che Gabriêl al nassè, la comari i de une pacute su la schene, il nin al molà une zigade che le sintirin ducj dabàs.
La comari, che e jere ancje strolighe, e sentenzià: – Chest frut al fasarà tante strade.
E traviersant i circui de vite, Gabriêl al finì tal remot ream di Tonga, un arcipelac tal cûr dal Pacjific meridionâl, cognossût pes sôs rasulis di rene blancje e une culture siore e vivarose.
Gabriêl al veve mans magjichis, al saveve sielzi lens preseâts, creânt i plui biei ogjets mai viodûts. In pôc timp la sô buteghe e cjapà nomee.
Une dì Gabriêl al viodè te buteghe une biele zovine, nuie di mancul che la fie dal re, che e cjalave cun interès lis sôs oparis. Si svicinà domandantji se e cirive alc di particolâr, di fat jê e voleve fâ un regâl a so pari. I disè a Gabriêl che i varès puartat un aboç.
Lis zornadis a passavin, il zovin le spietave ansiôs. Di improvîs e rivà displeant un rodul di cjarte devant di lui.
Al jere un lavôr fin e meticolôs. La zovine e leve ogni altri moment te buteghe, a Gabriel no i deve fastidi, anzit, si jere creât tra di lôr un clime di amicizie.
Finide la incarghe, une scrivanie, Gabriêl le puartà ae residence reâl. Le meterin tune stanzie plene di libris.
Il re le scuadrà dal dret e dal ledrôs, vierzint ducj i scansei segrets che e veve, i siei voi a lusivin devant di cheste zoie. Bussant sô fie e dant une strete di mans a Gabriêl, si lu sintì dî: – E je une scrivanie degne di un re.

di Galliano di Buenos Aires (Fuschi)
#1696