CC24Jugn#22 – L’ippogrifo e l’orcul

#22 – L’ippogrifo e l’orcul

Andrian al passave lis zornadis a lei di dut e di plui: romançs zâi e di aventure, saçs di storie e gjeografie, classics, poesiis, e vie indenant. Il so gjenar preferît, però, al jere chel fantastic: i faseve dismenteâ l’orôr cuotidian, la gnot scure e i siei orôrs. Al veve let libris come Dracula, Frankenstein, l’Orôr di Dunwich, cu le sperance che a fossin bogns di esorcizâ il terôr che i si rimpinave sù pe schene ogni gnot; i fasevin pôre, sì, ma no come lis robis oribilis che i tocjave passâ.
Dome un gjenar di libris al jere rivât a judâlu: chei di fantasie. E cussì, cuant che lis ombris a scomençavin a fâsi dongje cul cricâ de sere, al tacave a pensâ al piçul Frodo che al superave mil faturis par puartâ l’anel a Mordor, al pensave ai cavalîrs che a cirivin il Graal, aes personis che, ancje devant dai pericui plui spaventôs dal mont, a scombatevin cuintri dal mâl. Si jere inventât un amì, bon tant che un toc di pan, un Ippogrifo, che i stave daûr, al cjacarave cun lui intant che al pative l’Infier e lu puartave svolant ator par monts tant lontans dal so, cun lui che i stave parsore, su le cadope morbide e biele. Graciis a lui, al rivave dibot a dismenteâ il dolôr.
L’orcul a rivave cuasi ogni sere a tormentâlu, ma cheste volte l’Ippogrifo lu veve sburtât a resisti: al veve robât une spade, un curtissat, cjatât in cusine, che al clamave Excalibur: al varès frontât chel mostri, un mostri cun dôs gjambis e doi braçs come lui, ma tant plui fuart di lui.
Lu spietave une grande bataie…

di Alessio Ecoretti (Nonio)
#1682

1 comment