Ricreazion – Il teme par il mês di Jugn

L’om al discocole i voi… Al somee pardabon interessât.
E alore jê i mostre i fruts, intant che a son daûr a fâ ricreazion…
La Mari de Gnot Nostrane e siere i voi e si plate intal scûr fintremai a deventâ une part di lui. Siruc al tache a pirlâ, cence polse, nancje di dicerni la muse. Ippogrifo al à za lis ongulis di cinc centimentris ancje se jes àn taiadis vuê matine. Tiremole e plee i comedons e i zenoi denantdaûr, a al siôr cuasit i ven un inzirli. Vercingetorix al è daûr a gjavâ vie lis fueis de gorne, cence doprâ la scjale. Stele Alpine si petene lis fueis. Teresine la Çuete, che no si pues nancje operâ, e fâs alenament te pissine parcè che e je dongje a bati il record dal mont sui 200 rane. E Catine la Nere è à i voi propit ducj di chel colôr… ma dut câs e je che cjale la television di Gjino, il vecjut che al è stâ tal paîs dongje. Bultrik, dispetôs, al à metût in bocje la bale e Incocalît no le cjate, cussì al è daûr a tirâ tal zei lis sôs furmiis mugnestradis. Daisy e je che svolete a vincj centimestris di tiere e Derna le salte, di ca e di là, disint Alè Hop ogni volte. Glorious Grene e fevele cun Brene Sfolmenade, il cjaval di Nonio, che i rispuint. Ma no si sa ce che si disin, parcè che a fevelin intune lenghe che a san dome lôr trê. Atile al sclape çocs e breis dome cjalantju di brut, Torototele al cjante cun vôs clare e limpie cul cjâf dentri intun seglot, No Ancjemò plen di aghe, ma cuasi. Secretariât, il frut contabil de scuele, al tire par aiar un mac di fulminants, stechedincj o claputs, cirint di induvinâ ogni volte trops che a son. Pûr trop al fale simpri di un o doi. Matungo al dopre ducj i siei vincjecuartri dêts par svualâ di un arbul a un altri e Fuschi, di sot, al zuie a fâ la sô ombre, precise precise. E Gato? Nuie, chel al ronfe come simpri, su la spice dal pin grant. Tant ancje se al cole al cole in pîts, cence nancje fruiâsi lis scarpis. Nevio al ficje la man tal brantiel par bagnâ l’ort e al tire fûr une bale di nêf, che al trai intor di Chel di Cormons, che lu disfe cuntune stranudade di faliscjis. Ghiringhel al conte ogni colp e a son za rivâts a 32, ancje se La Ciachegna, cence molâ di cjaminâ su doi dêts, e insist che e à smenteât un colp. Daûr la Lavagne ducj i doi, al busine Muspilli, cence vierzi la bocje. Ma in chel, une nule si pare denant dal soreli e une Ombre Grise e baliche par il curtîl. Ducj i fruts a fermin di fâ ce che a stavin fasint, e a businin Ooohhh, cu la bocje vierte e il nâs par aiar.
Non sono impressionanti? E dîs jê.
La ri-ringrazio per avermi mostrato le va-varie problematiche meritevoli di classi speciali, al rispuint l’Ispetôr dal Ministeri de Istruzion, tartaiant.
La mestre lu cjale cu lis mans sui flancs, scaturide.
Ma di quali problematiche sta parlando?