CC24Mai#27 – Diari di viaç de Antares 11

#27 – Diari di viaç de Antares 11

Ai 3 di mai dal 2853.
Di cuant che o soi partît a son aromai passâts 400 agns. Propit il 3 di mai dal 2453 la ANTARES 11 e je partide cun me parsore in direzion di PLANET LIFE, il planet che al varès finalmentri di tornâ a dâ sperance ae umanitât.
Ducj si jerin iludûts che la scuvierte di Ian Krapkov in chel 2412 e sarès stade la cure al disfaciment sociâl tacât cu la Rivoluzion Dal Bas, altre ilusion pe umanitât intere.
Ma o stoi fasint un grum di confusion in chest diari di viaç: anìn par ordin.

An 2392
La puare int di dut il mont, in gracie al sisteme CONNECTION MINDS, si è ribelade al podê unic di LEFT RIGHT, partît autoritari ch’al guviernave il mont. Il 12 di novembar al é saltât il lôr sisteme politic subit dopo des esplosions ch’a si son verificadis in ogni continent, tes bancjis, tes centrâls energjetichis e tai edificis di comant. Dut chest gracie al fat che 17 miliarts di personis si son metudis tal cjâf ch’al veve di sucedi, e Connection Mind al à fat il rest, rindi pussibil il lôr pinsîr.

An 2412
La rivoluzion di vincj agns prime e à puartât al podê la piês raze di int ch’e si podeve imagjinâ e ducj a an vaiût il muart, savint benissim ch’e jere ancje colpe lôr e dal pinsîr ch’a vevin vût doi decenis prin. Ma al rive Krapkov che tal so capot di camêl, cidin cidin, al ven metût su la plataforme VISION REV e al dîs: “O ai scuviert un sîr ch’al fâs vivi par simpri. Al bastave bevi une gote di chel miracul par no murî mai plui. Ducj contents, fintremai ch’a an pensât che o jerin in 18 miliarts su la Tiere.

An 2415
E jentre in vigôr la leç 27/15 ch’a impon a ducj di murî al compiment dai 80 agns. Une biele fieste cui parincj, si jentre te BEYOND ROOM (ogni paîs ind’à une) e tu sês biel che lât. De puarte daûr a vegnin fûr lis cinisis bielis prontis te urne che tu âs volût tu. Di chel an indevant al è stât un biel câl demografic, ma la societât mondiâl e jere aromai disfate e no recuperabile.

An 2440
Al ven scuviert un planet chal pos ospitâ il corispetîf di 200 umanitâts e al tache il progjet Plane Life, dal non ch’al jere stât dât a chê Tiere lontane. Al veve dome di jessi sielt un astronaute ch’al podes resisti intal spazi par 401 agns, e chel o ieri jo.

An 2453
O ven autorizât a jessi fûr de leç 27/15 e o partìs cul ANTARES 11.

An 2853
Al mancje dome un an e o podarai comunicâ a la Tiere se pardabon Planet Life al è vivibil. Daspò a tacaran a partî lis nâfs prontis di agns par puartâ li miliarts di personis. Cui no si sa. Prin e à di finî la vuere tacade 380 agns indaûr par decidi cui ch’al varès vût di partî.

di Alessandro Valoppi (Daûr la Lavagne)
#1657

1 comment