CC24Mai#26 – Rondolebalotis

#26 – Rondolebalotis

“Bundì mestri Ricart!”
“Bundì fruts!”
Ricart al poie il regjistri su la catedre, al segne i assents, po al dîs ai fruts di vierzi il libri di siencis a pagjine 93.
Fûr dal barcon al è un biel soreli clip di Primevere, i ucieluts a cjantin sui teis tal zardin de scuele. Propit dure fâ lezion tes ultimis setemanis di Mai…
Il mestri Ricart lu sa, e al decît di cambiâ argoment: No, lait a pagjine 117. Vuê, fruts, o studiin un inset speciâl: il scarabut stercorari. Tinut, scomence tu a lei.
“Il scarabut stercorari al è un coleotar de famee dai Scarabeidis, neri, di forme ovâl e cun alis duris che no i permetin di svolâ.”
Il mestri al zonte: “Chest inset al è ben cognossût pe sô diete alimentâr particolâr. Cui saial dîmi ce che al mangje?”
I fruts si cjalin un cul altri, ma no san propit ce rispuindi… Nancje chê fruielibris di Taresie, la preferide dal mestri, no lu sa!
“Su mo, dal non o varessis di capî… No savêso ce che al è il ‘sterco’?”
Par rispueste, nancje un cic. Ma Taresie e va te scansie a cjoli il vocabolari, e zire un pocjis di pagjinis e po e lei: “Sterco (sost. m.): feci, escrementi, specialmente animali”.
Dute la classe si sbreghe di ridi! Duncje il ‘sterco’ al è il ledan, insome, la mierde!
Ancje Ricart al rît, cumò sì che al à la lôr atenzion.
“I scarabuts stercoraris si nudrissin des buiacis di altris animâi e a àn un compit ecologjic impuartanton: a smaltissin il materiâl organic di scart e lu trasformin in humus, ven a stâi, in tieriç.
I stercoraris a fasin sù balotis di buiace par rivâ a traspuartâ miôr il materiâl te lôr buse. Lis balotis a son la lôr scorte di mangjative, ma ancje la cove par fâ i ûfs.
Par spostâsi, chescj scarabuts a van simpri daûr di une linie drete, e par orientâsi a seguissin la Stradalbe”.
Tinut al alce la man: “Ma alore, par lôr la mierde e je un tesaur!”
Il mestri Ricart al rît: “Sigûr, dut al po sei un tesaur se si sa cemût disfrutâlu! E soredut, ancje se tu vivis di mierde, no si à mai di pierdi di viste lis stelis”.

di Stralunade (Muspilli)
#1656