#14 – Stele alpine
Al jere za des fiestis di Nadâl che sô Santule i diseve: «a pene finît i esams tu âs di polsâ e soredut cul cjâf. Par chest, tu âs di passâ almancul dôs setemanis in Cjaressis tal mê stali. Un lûc fresc, cuiet, tal mieç dal bosc». Giulia e jere contente di vê scoltât chê femine. In chel stali, ancje se la cocjete un fregul e ciulave e cualchi surisute e sgarfave tal armaron, lu stes, e durmive dute la gnot.
E po ce biel par jê, sveâsi a buinore e viodi ogni dì a pene sot dal stali, rivâ intun roiuç un cjavrûl cui siei piçui a bevi e passonâ dulintor. Par dabon, un vêr paradîs, indulà che chê frute, aromai, e veve passade za une setemane. Pecjât che in chês bielis zornadis di polse, tes lungjis cjaminadis sui monts, no veve mai cjatade une stele alpine. Par Giulia no vê cjatât chel flôr al jere un grant torment. Cun di plui, a cheste sô aflizion si zontave un altri displasê.
Chel biel e bon fantat che le veve compagnade in chê vacance, magari cussì no, al jere masse timit. Di lui, Giulia, si jere inamorade, ma lu stes, chel imbambinît, pûr savint che il cûr di chê cristiane al bateve dome par lui, mai une volte che al ves cjatât il coragjo di strenzile jenfri i braçs e dai une bussade. Lis zornadis, intant, a jerin ladis vie di corse e par chei doi zovins la sperance di cjatâ une stele alpine le vevin dibot dal dut pierdude.
Conseâts di un om che di stelis le saveve lungje, a son partîts di Fors di Sot a son lâts sù in alte mont. Là sù, lis bielis pontis des montagnis e lis valadis ator ator a fasevin di chel lûc alpin une maravee. Pecjât che jenfri i crets e in tai prâts, di stelis alpinis nd’ jere nancje une.
A malincûr a chei doi fantats no ur restave che tornâ jù in val. E cjaminant, no tant lontan, a viodin che sul troi indulà che si jerin inviâts che no si podeve lâ indenant. Magari cussì no, i peçs che l’aiar al veve crevât lu vevin dal dut blocât.
Ma par fortune a cuatri pas al scoreve vie un glereon che al lave jù lu stes cuasi fin tal paîs. Dut ben, fin cuant che la glerie e tacâ a scori tant di corse di no podê restâ in pîts. Mancul mâl che su la diestre a pendolavin sul glereon trê ramaçs di un peç, che Marco tignint ben strete la man di Giulia, suntun di lôr si è ingrampât. In chel moment tante pôre e tant sconciert. Ma subit dopo, cjalantsi ator, Giulia e viôt dongje di un cret une biele stele alpine e tantis altris tal toc di prât dulintor. Viodint chei flôrs biei, blancs come la nêf, i siei voi pe emozion a son strafonts di lagrimis di gjonde. E in tal stes timp ancje Marco, cjalant chei voi maron dal dut bagnâts si è comovût, sintint che i bateve fuart il cûr. Un bati tant potent che al à parade vie che timidece che e stratignive ducj i sintiments chel nol rivave a tirâ fûr. Cussì parât vie dutis lis sôs pôris, strenzint Giulia tal pet, i à dât tantis bussadis, fasintsi perdonâ di dutis chês che no i veve dadis prime.
di ?
#1674
