CC24Jugn#10 – Catine la Nere

#10 – Catine la Nere

Un viaç il vint al puartave il profum dolç dai teis, mi disin i vecjos, e jo no sai ce che i son chescj TEIS, i vecjos i son ducj mats.
Il vint al puarte dome savalon e schifo, ma vuê al puarte ancje froseniç (fuliggine) di un fûc che al art no lontan di chenti.
In tal froseniç, in tal fôc, e je Catine le nere; le sô cjar brusade di vecje strie cumò e danze, ma tal savalon. Haha! STRIE!
Se cumò i fasès jessi di cjase i fruts i usmaressin dome le peste de sô cjar brusade.
Un fi al è un don, doi une benedizion, trê un miracul. I fîs no nassin plui, je colpe sô e di chês come jê. Jo soi siôr!
Catine ju copave, i fruts, fin cuant che i vuerîrs no le àn inpresonade, tant che vosave maledizions in te lenghe blasfeme, oscene dai siei dius.
Ju copave i fruts, fin prin inmò che a nassessin, cun i siei rîts dal diaul. Strie, sassine!
L’odôr de sô cjar brusade al si strissine fin sot i barcons – mi ven di ridi ma a mi sta vignint cuasi fam. Il savôr da le cjar no mal visi cuasi nencje plui, bestiis and’ è pocjis e son dutis dal Baron, e i cjamps no dan plui blavis nencje a sanganâi dentri – colpe sô, di chês come jê.
Catine e rovistave tal SPELE, a cirî vielis incjantêsims par indurmidî i vecjos, e ju copave, e cuant che lôr a murivin a sameavin fin contents. Strie! Il Baron e i siei vuerîrs i àn dât fôc a lis ruvinis dal SPELE. Cumò nol reste plui nie di prin che il grant fôc da la apocalisse al vignis jù dal cîl e al brusàs dut e ducj, lassantnus cheste vite di savalon e di fam e di cjalt e di fôc e di orôr. I sants son lâts in cîl, e no brusin cun nô in chest Infier. Cualchi viaç ju invidiei, i vecjos copâts di Catine. Jo i no soi mai content come lôr di muarts. Mi mancje il flât: i mi spaventi dai miei pinsîrs, e i mi segni: al sarà l’odôr de cjar brusade a indusimi in tentazion, e le fam, a fâmi vignî pinsîrs blasfemis. I cjali i miei fîs: un al è un don, doi une benedizion, trê a son tancj di sfamâ. E jo ind’ ai fam. Fam vere, antighe, fam di cjar. Tante fam. Fam nere.

di Fulvio Romanin (Nevio)
#1670

1 comment