CC24Jugn#06 – Tiremole

#06 – Tiremole

I viei a contavin la storie dal orcolat che al meteve un pît sul tor di un paîs e chel altri pît sul tor di un altri. Jo no ur crodevi ma, intun tart dopomisdì di cjaldon trement, mi è capitade une robe strane.
O vignivi jù di Vençon a Osôf cuant che o ai viodude un grande ombre. E un grant sgavarâ al vignive dal cîl. O ai fermade la machine. O soi jessude. O ai cjalât par aiar. E al jere li, parsore di nô. E sameave la sene di un film american catastrofic: cuant che a son ducj cul cjâf par aiar a spietâ la rivade dai aliens.
Fantacinis cu lis pipinis in man, viei, paris di famee, impiegâts che a tornavin di vore, camioniscj, insome, ducj a jerin jessûts dal propit mieç su la statâl par cjalâ il spetacul.
Un omenon, o miôr, al jere alc di mai viodût prime!
Sec come un stec. Al veve un pît sul tor di Osôf e un altri, o stimi, sul chel di Buie. Neri cuntune grande muse blancje a forme di piruç, cul nâs cilindric. Al veve dai guants blancs intes mans e un cjapiel ros sul cjâf, grandonon, plui un pavei ros ator dal cuel e lis scarpis zalis.
Il mostri al sameave propit saltât fûr di un vencul.
O pensavi che chê creature e fos capitade li di cui sa cuâl univiers paralêl e par cui sa cuâl fenomen scognossût.
Il mostri si slungjave simpri plui adalt e po si strenzeve. Po al tacà a zigâ. La sô ridade e vignive jù dal cîl! Al tacà a fevelâ furlan!
Dissal: “Uah uah uah, soi Tiremole, fi de gome e da cole! Blanc e neri, come il vin, e di grant a picinin.”
Ta chel mi vignì l’imbast.
Mi tornai a sveâ intun jet di ospedâl. O çavariavi. Po mi cuietai. O domandai informazions su chel grant omenon sec ma nissun al saveve disimi alc. E jere une Istât cjalde di murî e lis machinis si jerin fermadis su la statâl. Al jere stât un ingorc grant. Tante int e jere stade mâl vint vût svaniments.
Po mi alçai in pîts lant bande de sale di spiete. Al jere un frutin sentât, sui dodis agns, cuntun fumut in man. Il titul al jere ‘Tiremole’ e su la cuviertine al jere propit l’omenon sec che o vevi viodût. A chel pont o sintii une vôs, come alc che al fevelàs dentri di me:
“Uah uah uah, soi Tiremole, fi de gome e da cole! Blanc e neri, come il vin, e di grant a picinin.”

di Derna
#1665