CC24Jugn#04 – Dulà sêstu Ciachegna?

#04 – Dulà sêstu Ciachegna?

Cuant che i furlans a son rivâts 150 agns indaûr a vevin cjatât une tiere salvadie plene di vite. I vevin metût di non Resistence ae colonie, vuê cjâf lûc de regjon. Di plui di cuarante agns al jere tal Guvier il stes partît. I puars a jerin simpri di plui e in pôcs a lavoravin pe regjon, cuntun salari di miserie. Lis cooperativis par judâ la int a son nassudis tal 2001, cumò a jerin i politics a gjestî un vêr riu di bêçs mandâts dal Stât nazionâl.
In doi mês e rivave la votazion regjonâl e i nons e lis musis dai candidâts a jerin dapardut: radio, television, locandinis. Soredut di chê cubie che e viodeve cun man di fier une cooperative, dai veris parons de puaretât.
Il fantat timit le veve inmagade cu la sô machine, le puartave a mangjâ tai puest plui siôrs, i faseve biei regâi. Cecilia si jere inamorade di chel zovin, cuasi un frutat. Si jerin sposâts di scuindon pe pôre di sô mari. Tes fotos, jê cuntune bocje di ridi lusorose, lui cul cjâf di sot. Cuant che lu vevin savût i siei, che a jerin chei des locandinis politichis, lu àn obleât a domandâ il divorzi. Il so amôr però al le indevant, cumò platât.
Il zovin i de la gnove daspò di une gnot di amôr: al veve i biliets di avion par lâ a stâ in Patagonia, lontan des çatis de famee.
Cecilia e veve bussât la mari e cuntune valis e jere jentrade cun lui ae cjase sô chel misdì che la ultime telecjamare le veve cjapade ancjemò vive.
Dulà sêstu fie?
Sô mari e jere lade dai carabinîrs, ma il lôr podê al jere grandonon. E à scugnût clamâ i gjornaliscj nazionâi, che si jerin butâts dentri vulintîr. E par fin a jerin stâts processâts ducj. De indagjin al è saltât fûr che intant che jê e cirive dulà comprâ cjocolate tal aeropuart, lui al cirive cemût disfâsi di un cuarp. La mari di jê si ricuardave di chel gustâ cuant che si svantà che i purcits di so pari a jerin bogns di mangjâsi un nemâl intîr.
A vevin cjatât la crosute di jê tal riut daûr de aziende ma i piçui tocs di vues no bastavin par indentificâle. Cumò al è passât un an e te regjon al comande un altri partît.
Dulà sêstu Ciachegna?