CC24Jugn#01 – Glorious Grene

#01 – Glorious Grene

No mi veve mai interessât nuie dai parincj talians e inmò mancul di voaltris. Anzit, no savevi nancje che a esistessis.
Ma cuant che o ai finît sedis agns e mi àn mandade in vacance ta chel paisut grant mancul che il gno cuartîr, al è cambiât dut. No sui parincj, vecjuts cidins e cuiets che no fevelavin la mê lenghe e si fasevin capî a fuarce di jemplâmi il plat di mangjative.
Al è cambiât dut su di voaltris, che us ai cognossût.
Nando, cu la piel cuete di soreli e un çuf neri che i platave i voi celescj e slusints, intant che mi mostrave lis rêts di pescjadôr. Nuzzo, magri e plen di muscui, che mi à mostrât il mâr di gnot, de impalcadure dulà che al lavorave di manovâl cun so pari. Toni, cui cjavei bionts che a balavin tant che forment intal aiar de sere, al cjant dai gris, intant che mi insegnave a fumâ.
E pâs se nissun dai trê al rivave a capî che di cognon fasevi Grenet, e si diseve Grené e no Grene, come se no meretàs nancje un acient. E pâs se jenfri voaltris mi clamavis La Frangesa, ancje se o rivavi dal Belgjo. Miôr cussì, pluitost che sintîus a cirî di clamâmi par non, Anais, par voaltris cetant alien e fastidiôs.
E alore, te ultime sere de sagre, cui fûcs e la loterie e lis gjostris e lis biris che mi puartavis, cumò un, cumò chel altri: Grene com uit mi, Grene du iu uont, Grene iu ar biutiful, Grene chi e Grene là… Grene… Grene soi jo e o ai sedis agns e no ai mai fat l’amôr, e come intun zûc mi imagjini cuntun di voaltris, suntun prât, e o pensi a cemût che al podarès jessi.
Ma no lu scuvierzarai mai.
Mi vês puartât vie sburtantmi, tun cjanton di scûr, sul ciment e tal odôr di pis e scovacis. No ai podût fâ nuie, nancje vuicâ. O ai podût dome tornâ fûr ancje i budiei, pal mâl e pal schifo. Disinfetâmi la schene e il cûl des sgrifadis. Netâmi lis cuessis. Preâ che ca di cualchi dî a mi vignessin lis mestruazions, sanc par lavâ il sanc. E viodiûs la matine dopo, chel sì, o ai scugnût, passant denant dal unic bar dal paîs cu le valîs fate e dentri, ta chês mudantis sporcjis e sbregadis, dute la mê vite di doman straçade. Grene, lu vês dite ancjemò, ma no par saludâmi. Lu vês doprât par meti dongje ofesis che o capivi benon, ancje se no jere la mê lenghe. A glory night, Grene! Mi à businât il camarîr, prin di montâ su la coriere.
E chê peraule mi à roseât. Par agns.
E cumò soi chi. Pardabon in France. A Parigji.
Il flum, grandonon, al riflet lis lûs de citât come une gjostre.
Mi soi vistude di blanc. O monti sul parapet e mi lassi colâ.
Vele chi, cumò, la vuestre Glorious Grene.

di Pieri Moràs (Atile)
#1660

2 comments