CC24_La classifiche di Mai

O sin cuasi tal mieç de competizion e al va dit che i mus plui competitîfs a stan planc planc saltant fûr. Chest mês di Mai il teme al jere une vore dificil (o facil, cuissà) stant che si domandave un ciert gjenar leterari e magari propi un che il mus nol è usât a scrivi. E invezit… al è saltât fûr un mês plen di contis une diferente di chê altre e se o nin a cjalâ i prins 5 de classifiche, a son ducj gjenars diferencj.

Cun di plui, us spiin ancje – ma al baste cjalâ la colonute dal scart cuadratic – che cualchi conte e je rivade a finî prime in classifiche par un zurât e cuasi ultime par un altri, e plui di cualchidune e à scarts une vore alts. Ma come simpri, la conte cu la medie vôt plui lineâr e alte e à vinçût.

Ma ve chi, la classifiche dal mês di Mai.

(o savìn che e je picinine, ma su Fb e su Instagram lis podês cjatâ in version imagjin)

Al à vinçût, pe seconde volte chest an, Brene Sfolmenade, cuntune conte fantasy, Aiar di magjie,  che però e à cjapât une plee ironiche e che o podarês scoltâ in direte miercus matine tor 9.30 a Radio Onde Furlane…  e ocjo al aiar di magjie…

E si ben che doi de zurie le àn metude come preferide, al secont puest, ma prin pal public insiemi a Nonio, Torototele al torne ai plans alts de classifiche cun Alimentare. Un zâl, dulà che si scuvierç cui che al è chel fi di troie che a àn copât… Lei par gjoldi.

Tierç scjalin, une musse che aromai e à tacât a cori une vore. Teresine la çuete, i jere capitât un noir, che nol faseve par jê e invezit e à tirât fûr Sex on the rocks, conte triste e ben poiade.

Si sintin di segnalâ, jenfri ducj, ancje lis contis Tantepôre e il drâc, Intune gnot di lune plene, Rondolebalotis, Une invenzion discomude, Classificazions, Peter, Tes sachetis dal dispresit, Une vecjute tenare e diari di viaç de Antares 11, che cence cjalâ la classifiche, a àn dutis alc ce dî. Leieilis!

Ultime robe… O savìn che la CorseCurte e je une gare che e je ancje a eliminazion, stant che no ducj a rivin simpri a meti il mus in corse. Chest mês a son stâts in trê a no rivâ a partî, e a vevin ducj i trê zuiât il bonus “No cumbini”… Ma o sperin che a vedin timp di recuperâ za cul mês di Jugn.

Ma vignin al FantaCorseCurte… ancje ca, cualchidun nol à votât e al à fat zero ponts, e ancje ca a son stadis preferencis une vore variegadis. Ma i prins cuatri de classifiche a tegnin bot.

Muspilli, Derna, Gjatemarangule e Ombre Grise a son ducj intune grampe di ponts e a àn ducj imbrucjât un mus che al è rivât intai prins cinc. A àn nâs, in bande che orelis. Daûr però al è cui che al à molât il colp, cence votâ, e cui che al è jentrât in gare di pôc, come Ricart e Jacum, che a stan scalant la classifiche… In sumis… ancje tal FCC24 al è dut di decidi.

E dopo il mês di Mai, la classifiche gjenerâl e je cheste ca.

Al consolide il so prin puest Brene Sfolmenade, che al è ancje a la seconde vitorie di tape e al vinç il prin dai doi premis mensii. Catine la Nere e à molât un pôc, ma e ten il secont puest, e invezit Glorious Grene al ven sù ben, al tierç (us vin lassât la posizion dal mês passât).

Dut câs, Torototele, Muspilli, Teresine la Çuete e Nonio a somein propit ancjemò in gare par rivâ devant e i prins trê no podin durmî cuiets e ur tocje molâ une buine conte ancje a Jugn.

E pe classifiche de Vierte? Al mancje dome Jugn e par cumò, cence sorprese, e je in teste Teresine la Çuete, cun 55 ponts, ma par vinci e à di mugnestrâ mus come Brene Sfolmenade (51), Muspilli (49) e Nonio (50). Nol sarà facil…

E intant che par savê alc di plui us invidìn a scoltâ Ondefurlane Miercus, cul nestri Ticât dai Mus, par il mês di Jugn o sin a 8 contis rivadis… E viodarìn ce che al sucedarà!