CC24Avrîl#28 – Amîs di une vite

#28 – Amîs di une vite

Tu tu mi crodis, vere? Tu sâs che no je colpe mê. Tu sâs trop ben che i volevi.
Tu mi cognossis. Miôr di ducj chei altris. Tu mi fasis compagnie di une vite. Tu sês stât il gno prin amì. Tu mi âs viodût a colâ, a vaî, a no savê ce strade cjoli. Mighe come te. Tu tu sês simpri stât il plui brâf. Chel scaltri, plen di cognossincis, simpri pront a butâsi tune gnove aventure.
Tu sês stât tu a insegnâmi a gjavâ vie il capot di insigurecis, a no contentâsi di ce che si à sot man, a olsâ a sfidâ il mont. Tu mi âs trasformât di un sfigât in ultime file al sex symbol incjantadôr. Ti è bastât scjocâ cui dêts. Incredibil. Di cumò a dibot tu ju vevis striâts ducj a vignîmi daûr. O tu mi vevis striât me, cuissà.
No stâ a fâ chê muse. Chel rideç, sì. Tu savevis che e sarès lade a finîle mâl. Purpûr, tu âs continuât a stiçâmi, a sburtâmi, a lassâmi sbrocâ. Simpri di plui, simpri masse inlà, simpri fûr di ogni limit. Sì, tu sês stât tu. Tu sês stât tu a cambiâmi.
Finissile di cjalâmi cussì!
Tu sês stât tu! Tu le âs copade tu! Tu jeris zelôs di me, di ce che tu mi vevis fat deventâ! O jeristu forsit zelôs di jê? Tu le varessis volude par te, no mo? Ti brusave viodile cun me, savint che il vêr bulo tu jeris tu. Dimal! Dimi la veretât! Tu le âs copade par svindic! Dome parcè che no tu podevis gloti la tô sconfite.
Planc, planc, planc. No stâ a sustâti cussì. Cuietiti. No covente vaî. No tu âs fat a pueste. Nancje tu no tu volevis che e les cussì. Tu i vevis za cridât, ti impensistu? Tu jal vevis za dit che no veve di compuartâsi ta chê maniere. Ma jê nuie. Tu tu volevis dome fâjal capî.
Laviti ben lis mans, cumò. Nete il sanc. Cjate une soluzion. Inventiti alc.
Parcè no ti movistu? Tu sês tu chel plen di ideis. Tu scugnis judâmi. Tu âs di fâ alc!
Vonde! Molile! Gjaviti vie chel sblec, jude boie! Judimi!
Tu podarâs vê lis tôs pirulis, dopo, no stâ a vê pôre. Tu viodarâs che si comede dut.
Ma cumò finissile di friçâ e torne di cheste bande dal spieli!

di Fuguline (Teresine la çuete)
#1626

1 comment