CC24Març#31 – La cjamare 106

A jerin chei che a vignivin nome a fâ i bagns terapeutics e a restavin un pâr di setemanis. A disevin che lis aghis a fasevin vuarî lis malatiis de piel. Ancjemò cumò al è cussì.
“Marchiquita” – Piçul Mâr – al è il plui grant spieli di aghe salade dal Sudameriche. Par decadis, a jerin plui di vincj hotel te lagune, ma il plui grant e il plui misteriôs al è simpri stât il “Grant Hotel Viena”, vuê cuasi sbandonât.
Un grup di vicins lu cjape pe man par fâi cognossi la sô storie, che tant che un vêr Vâs di Pandore e je buine di sfrancjâ i mil diaui nome cui ricuarts. Si dîs che al sedi un spirt che si viôt te cjamare numar 106.
Tal 1938, a pene finît, al jere un albierc cun trê mûts di lozament: une part economiche par chei che no podevin paiâ masse, une altre di fasse medie, cun cjamaris e bagns individuâi, e une fasse plui alte cu lis cjamaris, lis vascjis di aghe salade, e aiar condizionât.
L’hotel al à lavorât fin te Seconde Vuere, e in chel moment al à vût un periodi di lusôr, cuant che a jerin no pôcs i todescs che a scjampavin in Argjentine.
Il prin paron, Max Pahlke, al veve comprât il teren e lu veve tirât sù cuntun grum di servizis e ostentazions. Al veve chê malatie de piel clamade “psoriasi” e lis carateristichis des aghis de lagune a mioravin la sô cundizion.
Pahlke al jere tornât in Europe, biel lassant un gjestôr, Martin Krieger, veteran todesc. Un event stramp lu veve vût tant che protagonist, ancjemò cumò si ricuarde te vile.
Par trê dîs di novembar dal 1947, ducj i dipendents a son stâts invidâts a no vignî a vore. Si conte che une camarele di non Helke, che no saveve nuie, e fos vignude tal hotel ta chês zornadis. Vie cui agns, si contave che Krieger le veve fate platâ. Ma jê e à viodût une sene di no smenteâsi: a son vignudis trê machinis neris uficiâls, di une e jere smontade la sacume inconfondibile dal president Peron; di chê altre, un om plui piçul cun mostacjis curtis. A àn fat une riunion di sù par jù une ore e mieze.
Di chel dì, Krieger nol si jere mai cuietât.
E al jere muart tal 1948, di un colp, te cjamare numar 106.

di Eduart Baschera
#1598

2 comments