E o sin ancjemò daûr a pensâ a la prime presentazion de La Stagjon des Contis, ma come che o savês, il nestri Ostîr nol rive a stâ fer e alore ve ca, un altri apontament GALATIC dulà che o metin adun la fuarce soversive de nestre Ostarie. In gracie des manifestazions inte suaze de Fieste dal Friûl, inmaneadis cu la poie de Arlef e sot dal voli de sô cjase editore, la Kappa Vu, ZARATON, la creature che aromai o cognossês une vore ben e va nuiemancul che a SAN ZUAN AL NADISON.
A fâ ce? Ma clare! A fâi la Fieste al Friûl, o in sumis… a fâ fieste pe fieste dal Friûl, o miôr ancjemò, Friûl al fâs la fieste al Friûl in ocasion de Fieste dal Friûl! No si pues pardabon mancjâ! Ancje parcè che ancje se il spetacul al va daûr dal libri, no si sa mai cui che al è e ce che si inventìn di gnûf e si che, che o vedis di lei il libri o che no vedis di leilu, al va simpri ben vignî a fâ un zîr a sintîsi contâ une storie dulà che… cuasi ducj chei che o cognossês a muerin!
Si che duncje, intant noaltris us metìn fûr la gnove, ancje se e je lontane, e po dopo us tornarìn a visâ ca di pôc, setemane che e ven, par viodi se si sin inventâts alc di gnûf, che clare no us spiarin. 🙂
Dut câs, ve ca lis locandinis in pdf par talian e par furlan:
E sot us metìn ancje la version in imagjin par talian.
E intant, savêso cemût che us sticìn? Ve ca, lis primis riis dal libri, cussì o savês ancje cemût che al scomence il spetacul!
La dì che il Friûl si è sveât e je stade cetant fûr di ogni logjiche e comprension umane che al è dibant cirî di descrivile o di contâle tai particolârs.
Si pues dome strucâ e gjavâ vie la piel, la cjar e i budiei de storie, lassant fevelâ i vues. E i vues a disin che il Friûl, intindût sù par jù come teritori e cence abadâ masse ai confins politics, ai 3 di Avrîl dal 2023, tor siet sot sere, si è sveât, al à slungjât lis çatis di denant, resentantlis de tiere intal mâr; al à tirade sù la schene, logade ben o mâl dilunc la linie Udin-San Denêl, e dopo vê dreçade la code, dispirulant il Coglians e sdrumant mieze Carinzie, al à scjassât fûr ancje lis çatis daûr, condividudis cul Venit – la drete – e cu la Austrie – la çampe. Al è restât in spiete par un baticei dai siei, ben o mâl un cuart di ore, e daspò al à metût fûr il cjâf, che al veve la forme de lagune di Grau, che a chest pont le veve fate nassi lui, cuant che lu veve parât sot.
Ancjemò un baticei, par orientâsi, e daspò une sburtade cun çatis e code, par inviâsi intal Adriatic. Delicât, par trop delicât che al pues sei un nemâl di passe siet mil chilometris cuadris, il Friûl al à tirât fûr dai flancs dôs pinis, une fate dai vanzums dal pordenonês, chê altre dute slovene. Dome in chel, la bestie e à cjatât la sô autonomie, e intun pâr di vogadis si è sburtade viers aghis plui fondis e si è metude in polse. No une polse cidine, però. Lis scais de schene a tremin e vibrin, fasint saltâ par aiar ce che al è vanze dal teritori come se al fos un zugatul di un canai viziât. Lis cjasis che no son ladis jù cui prins moviments, a vegnin niçuladis intun cricâ di modons e cops, e la plui part dai arbui si cjate o sledrosade o glotude dentri de tiere.
1 coments On Zaraton al fâs la fieste… al Friûl!
Pingback: Zaraton a San Zuan al Nadison – La croniche | Contecurte ()