CC24Març#20 – Ben Om

#20 – Ben Om

Intun mont plen di malstâ, un unic non al discjadenave murmuis di stime: Ben Om. Ben Om al jere un om di no crodi: nol esisteve un puest indulà che nol podès stâ, si cjatave ben dapardut. Siberie, Artic, jungle, savane, isulis tal mieç dal ocean, favelas e palûts plenis di besteatis rognosis. Nol esisteve un puest bon di fâlu stâ mâl.
Fintremai tal Pôl Nord al jere rivât a sorevivi cence problemis, pardabon in chê volte che un grup di huskies, scjampâts dal lôr paron, indiaulâts e plens di fam, lu vevin circondât par crustâlu vîf. I husky a vevin capitolât denant di chel mût di fâ serafic e cuiet, che nancje il frêt estrem al jere rivât a meti in cuistion.
L’unic che al veve metût in dificoltât il so estri al jere stât il desert dal Gobi: i mancjavin i tais, ma ancje li, framieç une crustade di savalon e chê altre, al è rivât a svuincassile. Aromai al jere deventât cussì popolâr che i solits butegârs a vevin metût in cumierç une linie di prodots pal gabinet clamâts Ben ON, par fâti stâ ben propite dapardut.
Ma a copâlu al è stât un altri gjenar di desert: l’ariditât de societât e dal fâ tant par fâ e dal cjacarâ tant par cjacarâ. Daspò dal ultin aperitîf cuntun fastidiôs grup di hipsters, al veve pensât che ancje i husky rabiôs a jerin miôr di chê compagnie. Pecjât dome che ju veve mangjâts par scombati il frêt. E cussì al decidè di lâ tal zoo par imbusâsi dentri dal gabiot des tigris. Ancje li, intant che lis tigris lu crustavin cun calme e lu fasevin a tocs, si sintive ben: miôr chel che supâsi i discors dai fighets pal rest de vite.

di Alessio Ecoretti (Nonio)
1587

2 comments