
#01 – Ce lungje!
Ce lungje!
Finalmentri o soi rivade dongje Proxima Centauri. E samee une robe di no crodi. Une volte a vevin calcolât che si steve miârs di agns par fâ un viaç fin a la stele plui dongje dal Sisteme Solâr e invezit o vin cumbinât dut in cent agns. Dome cent agns! Par precision a son cent e un.
Meracui de tecnologjie umane!
Une grande vele e à puartât une piçule scjatule di struments. Partide tal an 2054 par rivâ tal 2155. E ca di cuatri agns i abitants de Tiere a savaran che o soi rivade a destinazion e no ai cuasi vût problemis. Juste cualchi detrît cuant che o ai passât il Nûl di Oort al à sbusât la vele ma daurman i robot-nanui le àn comedade.
No mi spaventave svolâ inta chel ocean di spazi. O viodevi lis stelis de nestre Galassie, plui o mancul sflandorosis e lis galassiis plui lontanis invezit debilis e smamidis. Il soreli al deventave come un puntin fin a confondisi cu lis altris stelis ma mantignint simpri un lusôr discret e infratant une di chês stelis e deventave simpri plui grande, parcè che jo i rivavi dongje. Une piçule stele rosse.
E cumò o soi chi, in orbite ator di un planet che al zire ator di Proxima Centauri.
Il gno messaç, a la velocitât de lûs, al rivarà su la Tiere in cuatri agns e alc.
OMS E FEMINIS DE TIERE. O SOI RIVADE. DUT A PUEST. PURTROP IL PLANET CHE AL ORBITE ATOR DI PROXIMA AL È PLEN DI MAGMA. A SON MILANTE E MILANTE VULCANS.
MA JO O CONTINUI A ESPLORÂ. O AI DI CJATÂ UN PLANET CHE UN DOMAN O PODARÊS COLONIZÂ.
MANDI
FIRMÂT: LA VUESTRE SONDE
di Derna
#1566
2 comments On CC24Març#01 – Ce lungje!
Cui sa se un doman e podarà la drete , mi pâr che ca dant timp al timp e po la drete ancje cheste. Lussian
Pingback: Lis contis in gare tal mês di Març | Contecurte ()