CC24Fevrâr#15 – Colôr cjapiel dal lat

#15 – Colôr cjapiel dal lat

O jeri une frute, o fasevi la scuele elementâr, mi plasevin une vore lis aventuris, soredut lâ ator pai cjamps cun la mê vuardie personâl nomenade “Stellina”, une cjice miscliçade cun la passion par lis larvis che si platin tes lidris dai arbui. Ma si visaiso l’Invier dal 1985? Jo no, infûr de neveade. Come che soi jevade mi soi inacuarte subit che al jere alc che nol cuadrave: masse cidin, parfin in cjase. Duncje mê mari e jere in taverne a piâ la stue, no soi rivade nancje a dâi il bundì che a sec i ai sberlât: ”Ma parsè no mi âtu sveade?”
“Ve li ve, che la scuele a e vierte dome par te, va li di fûr, sin blocâts de nêf”.

E veve reson… la nêf! No vevin ancjemò cjalât di fûr: vierte la puarte e spalancât i voi… la nêf, il siò colôr, il cidin che al puarte, il frêt odôr che ti va su par il nâs. Biele! Saveiso chei pinsîrs che a ti passin subit per il cjâf: tirâ lis balis di nêf, fâ il pipinot, l’agnul distirade par tiere, mangjâ la nêf, cjalâle che a ven jù, pensà che se si bute in ploie il spetacul al finìs… e se inglace? Insome dome il pinsîr par me a jere une aventure, ma spaventose e tremende tant che i grancj a vevin pôre par i fastidis che e parte. Ma nô fruts no!

“Mame, vareis di rangjâsi cence di me, jo, o ai di lâ a salvâ la scuele!” Peraulis mai plui sintudis, robis di lassâlis scritis in cjarte di bol in municipi. Soi partide intabarossade e cuntune scove di soròs. Ducj i fruts dal paîs de mê classe a jerin puntuâi e armâts come me. Mancjavin dome chei dai paîs plui lontans, pecjât… si podeve fâ une vuere, sigûr che i varès trat une balonade a chel pipinot di Meni, un sturnel che mi menave ator parce che, cualchi setemane prime, mi jeri rabaltade sul marcjepît. O vevi sbatût la muse sul ciment e in tal cerneli cumò o vevi une gruse a forme di triangul rabaltât. A mi clamave “Visitor”… come l’alien dal telefilm che al lave di mode chê volte.. La nêf e varés podût judâmi a ricjapâ la mê dignitât… ma plui tart soi vignude a savê che Meni a jere restât a durmî… ce pajaso! Ma intant, robis di no crodi. Farcadicis di nêf par dut e une e platave la puarte de scuele. No podevin lassâ lis robis in chel stât. No podevin fâ vignî sù Bepo, il bidel. In paîs a disevin che al dave di volte, al viodeve sbilfs e fadis in tal siò camarin e al veve cjapât aspetative. In chel e rive la nestre mestre cu la sô 500 Fiat colôr cjapiel dal lat. Dute sburide, e cjape mâl il volt de strade e i dà dentri a une farcadice grandonone di nêf. Le viodin saltâ fûr cun la sô solite sgrimie e dî: ”Bambini, armiamoci e partiamoooooo!”. La mê mestre a leve mate pes citazions… che i plasès comedalis secont che i pareve, cheste e je une altre conte…

Che si sepi in dut il paîs: la machine de mestre e la puarte de scuele a son stadis liberadis dai fruts armâts fin sote i dinc di scovis puartadis di cjase in un timp massim di trê o cuatri oris, tra une balonade e chê altre di nêf. Ducj i fruts a àn prestat servizi cun onôr inte neveade dal Invier dal 1985. In tal boletin di vuere de setemane dopo si contin sîs fruts cun il pevaron sote il nâs, doi fruts cu la fiere, cuatri cuntune culate blu/verde dopo une sbrissade. La mestre? Nancje un fastidi, dute interie! Compits a sbreghebalon e sore dut in tal lunis matine il teme: “Racconta una avventura dove i protagonisti sono la neve e i bambini”.
Siore mestre, nuie di plui facil!

di Bultrik
#1552