CC24Fevrâr#11 – Puartade dal aiar

#11  – Puartade dal aiar

Vuê, cjatantmi a Sant Pieri, a pene saludât il gno amì Baiart, al à tacât a sbivicjâ. Une plovisine lizere e delicade ma che e pareve dome jessi la avanguardie di alc di plui grivi, almancul cussì o vevi pensât intun prin moment. E invezit si jere tratât di un di chei temporâi che dome ti sfiliin e che a colpissin intune altre bande, o pensi ta chest câs sul mâr.
O cjalavi bande misdì e o ai viodût un grant nûl a tor, iluminât dal soreli che al jere juste daûr e che, des voltis, al jere cuasi par travanâ.
Ve, propite ta chel moment precîs mi è parût di tornâ indaûr tal timp, di cetancj agns, a cuant che di frutin o contemplavi un cîl colôr dal plomp e o cjalavi bande misdì, o miôr, tra misdì e amont. Sì, chê volte che o jeri su la terace di mê none e al sbivicjave. Il drame dal burlaç si jere za consumât. Sul fondâl dal cîl a corevin come dai drâcs. Dopo al saltà fûr un piçul velîr. Il rest dal cîl mi sameave come un mâr dulà chê navute di vapôr e faseve vele puartade dal aiar. Mi son vignûts i sgrisui dome a pensâ a trop timp che al jere passât.
E dopo, tornant in me, e je rivade la aparizion: une vecjute cul façolet sul cjâf, come chês di une volte, e steve traviersant la strade e mi à domandât il braç par jessi compagnade. Mi diseve alc che no capivi. E fevelave une lenghe foreste par me che no soi di Sant Pieri ma, juste par un moment, mi pareve che e fos tornade mê none.
Traviersade la strade la vecjute mi à dit “Hvala”, une des pocjis peraulis che o capivi e dopo, di bot, no le ai viodude plui.
Come che si fos sfantade o rapide, puartade dal aiar.

di Vercingetorix
#1548