CC24Fevrâr#09 – A fâ dal mâl, no si cjate mai ben

#09 – A fâ dal mâl, no si cjate mai ben

Al jere a pene il mês di Avrîl e lis zornadis a jerin cussì cjaldis, che al someave di jessi jentrâts in tal Istât. In lunc e in larc, intes campagnis di Siôr Manli, il bacan dal paîs al jere dut in flôr.
A Març, il prin tai di maiulin, i fameis, lu vevin za tosât. I cjariesârs a jerin cussì cjariâts, fintremai che tancj dai siei ramaçs si jerin crevâts. I vignâi a jerin ducj florîts e su cualchi vît, i prins raps si jerin za incolurîts.
Tant ben di Diu. Tante bondance e dute par sglonfâ, di plui, lis sachetis di Siôr Manli, paron di ducj i cjamps dal so paîs. Un om che pe sô arogance al jere, par dabon, un indemoniât.
Chel ferabut, ai siei fameis, ur dave un blanc e un neri. E cu lis  feminis, che si lambicavin sù e jù pes sôs cumieris, al jere un vêr purcit. Puaretis, tant lavôr, sudôr, tant lambicâsi. Cetant di pierdi la salût.
E in chê vite tant tormentade, Diu la vedi inglorie, a veve lassât la scusse Marie, copade de tubercolosi. E subit dopo, a vevin sierât i voi par simpri ancje Ulive e Gjine. La prime, colant di un toglât e la seconde copade de pelagre.
E no si pues dismenteâ Rosine, spirade cuntun abort. E dute colpe di chel ferabut di Manli, che cun dute la sô fuarce, le veve lassade plene dentri intun fossâl.
Biadis frutis, che, lis gnots di lune plene, svolant insiemi, vaint, a tornavin, sui cîi di chê campagne.
E in une di chês gnots di Avrîl, i lôr agnui, che ancje di muartis no lis vevin bandonadis, ingropâts dal lôr dolôr, a àn decidût di svindicâlis, mudant lis lôr lagrimis in tancj piçui cristai di glace.
Cussì chel mont dut vert, intun moment, sepulît  sot di une zulugne frede, si è glaçât.
Ce disastri. Forment, vîts, pomârs cun dute la nature vivarose che a sflorive ator ator, sot chê lacje blancje, si son brusâts. Puar Manli. Ce dolôr, ce patiment par chel om, tant trist e tegnôs.
Un patiment tant grant che i à crevât il cûr. E velu la, potent e siôr di vîf, e cumò, dentri intune casse, destinât a deventâ pastum pai viers.

di Gjino
#1946