#08 – Il mago di Amazoz
Sô mari e so pari i jerin muarts: no che la robe i fossie mai displasude masse. No ju veve mai conossûts – e viveve cui barbas di simpri – ma il fat che chei cjargnelats dai siei le vessin clamade Dorotea nol sarés stât cussì grâf se il so cognom nol fos stât belzà Dorotea. Dorotea Dorotea: robis che nencje un spumant de LIDL.
Graciis pari, graciis mari, requiescant laitsulmus ecc. ecc.
Didì – cussì si faseve clamâ – e stave cressint e deventant une adolessente model prin dal timp: bruscose, grassote, antipatiche, vanitose e invidiose di murî. Chel cjochele di so barbe Indrî le coionave fis – “IL LUXURY SONO I SOGNI DEI POVERI” ma jê no voleve savê nuie, stupit barbe ignorant e cençe Instagram. Parcé che Rosabella, la sô miôr amie – e come spes che al sucêt tra lis frutis encje le sô arcinemie, une biondute fastidiosute e ipocrite – e veve plui bêçs di jê, e no mancjave di fâial notâ ogni dì.
“Hai vischto che bel vischtitto che ho, Didì, è un modello esclusivo!”
“Ich, ce esclusivo e esplosivo” e veve ghignât jê.
“E le mie belle scjarpette?!”
“Chês cragnis colôr arint? Au, buinis pal circo ecuestre”.
“Sono preziose e di lucsuri, cosa vuoi sapere tu, che costano una fortuna”.
E a si roseave il fiât. E intant che in palestre Rosabella la sborfomodella e steve fasint le doce, si jere sdongjade e i veve raubât lis scarpis fuint intal zardin de scuele. Bielis eh, magari no lucsuri, ma bielis a jerin bielis, come lis Buffalo dai siei siums. Lis veve metudis sù – cun fadie, chê altre e veve i piduts – e, encje se e veve mâl, e veve tirât il flât e fat un salt batint i tacs come tal film merecan. Si sarès sigûr cjatade in Kansas! E – dal nuie – une codebuie fuartissime le veve strissinade vie, sdrondenantle intal aiar. Finalmentri intun puest di citadins, no come il so paîs, e veve pensât, plene di pôre AAAAAAH!!! Dopo cualchi minût e veve batût il cûl in tune poçe di aghe puçolente. Gjavantsi il pantan dai voi si jere cjalade ator, ma no i sameave propi il Kansas, ma… i cjasons di Maran.
Dal dut sporcje di pantan, e veve imprecât: “ECO, TANTO LUCSURI TANTO CANSAS E CUESTO È CUELO CHE SUCEDE QUANDO COMPRI LE SCARPE SU TEMU!”
di Nevio
#1545