CC24Zenâr#27 – Doi pas indaûr

#27 – Doi pas indaûr

La sô e jere une disgracie no di pôc: i pîts denantdaûr, che si zontavin ai siei cjavei dai rivocs verts. E jere frute cuant che i oms a vevin copât sô mari, che e veve scombatût cun ongulis e dincj: une scurtissade, un spissul di sanc tal mûr dal landri e e jere colade par tiere, cuntun slambri tal cuel a pindulon. Di chê volte, le vevin obleade a deventâ fenomeni di baracon e dome par chest a vevin scomençât a puartâle ator cun lôr. Stant che e jere une Krivapeta, cussì a vignive clamade, le tignivin sierade tun gabiot cui pîts incjadenâts in mostre, a fâi previodi il futûr e a dâ cualchi savi consei a paiament: ju jemplave di sflocjis, logjic. Ma la part piês e jere une altre: la compagnie di rapidôrs e e gjoldeve intal abusâ di jê. E nol jere avonde: le pacavin dutis lis voltis che le sintivin cjacarâ te lenghe des sôs valadis. “Cos te gà dì?” al jere il leitmotiv de sô infanzie, parie ai scufiots e aes pidadis. I gnûfs scalfarots dal grup, cuant che a vignivin lassâts di bessôi cun jê pe prime volte, si blocavin denant dai pîts stramps, stomeâts, ma i bastavin doi seconts par tornâ incà: a lôr no i interessave chê part dal so cuarp. Ogni tant, e vignive puartade ator tignude pe cjavece, par fâi cjapâ aiar e par lavâle tai flums. Cumò le netavin a seglotadis, par vie che e veve cirût di inneâsi.
Ma al jere rivât il dì dal so svindic. Si jerin ducj sglonfâts di vin e sgnape tal mieç di une purcitade, e la maiorance e pendolave malementri o e nanave. Ancje jê e veve partecipât: il cogo al jere passât li di jê par doprâle tant che un ogjet ma, dut incocalît, le veve lassade libare des cjadenis. Cjapât sù il stes curtis doprât pal purcit, lu veve scjanât come la bestie che al jere. Copât l’om, si jere metude a spandi vueli combustibil dapardut e, une volte finît, si jere fermade cuntun batifûc in man, cjalantsi ator: il bivacament al jere plen di oms incoionîts dai fums dal vin e a viodiju i jere vignude une mareose bocje di ridi.
Si jere fermade. E veve fat doi pas indaûr. La stope dongje dal fûc s’impie, e veve pensât prime di brusâ dut.

di Nonio
#1534