Zaraton a Sclaunic… la croniche!

Alore… cirìn di jessi curts, ma o vin gust di lassâus un struc de serade di joibe, dulà che Chei di Contecurte, soversîfs come simpri, o vin fat murî buine part dal Friûl cuntun spetacul ispirât al libri dal nestri Ostîr, Zaraton. La serade, pûr pûr cun cualchi intop par doprâ la tecnologjie (da rest, in linee cu la idee dal libri) e je stade biele e corude vie svelte e se no vês voie di stâ a lei cheste croniche… ben po, podês ancje cjalâle, stant che il Muini de Osterie, Stiefin, al à metût adun une direte Facebook di gale.

Ma se invezit o vês gust di lei alc e viodi cualchi fotografie, alore ve ca.

Tant par scomençâ, chei de Pipinate nus àn judât a meti adun une super serade dulà che la senografie de nestre gjatemarangule al è stât facil metile in vore e dulà che il public al podût viodi e scoltâ dut cun gust e ben, no cate lis cjampanis e i tratôrs a fâ silo dulintor. Po dopo, bon, la Sartore Astrid e l’Ostîr a àn barufât no pôc, ma ae fin il super computer di Nilo al à cumbinât di mostrâ il fumut di Zaraton, che aromai o cognosês. Dopoi salûts dal Comun e une introduzion vivarose e zuarine  di Luca Pagot, aromai espert di marketing paesan simpri plui fidât dal nestri Ostîr, al è stât propit chest ultin a inmagâ dut il public, une vore cjapât, intal contâi une storie che e sarès sucedude tal 2024, ven a stâi chest an che al ven.

Ma l’Ostîr, dentri tal cercli dal timp, cui bregons e la maiute zaratonians, nol à dome contât, ma al à doprade un monitor par mostrâ ce che al diseve il mont di chet Friûl che al va ator pal mont… E alore Stiefin Pandolfo, in prestit dai teatrants di Sclaunic, al è stât un anunciadôr di gale, par il telegiornâl sui events. E in bande di lui, bravonons, il nestri Mestri Zuanluche Franc e la nestre Coghe Serena Fogolini a àn fat ridi (e ancje preocupâ) dute la int, jessin mo invasâts, mo lovecraftians, mo complotiscj, mo negazioniscj…

E intant che lis imagjins preparadis de Sartore a corevin daûr des lôr schenis, l’Ostîr al à pensât ben di tignîsi daûr de schene il berlon Michêl, par fâi contâ la storie viodude di dentri, dai trê personaçs de storie. Storie, che o savês, e somee di fantasie ma e me dute simboliche e plene di riferiments ae realtât dal dì di vuê.

Insome… vonde dai. Al sarès biel contâus che dopo o vin mangjât e bevût come zaratans, che si sin divertûts, che ancje se il teme al jere seri il spetacul nol è stât impegnatîf, che al à cjapât gust ancje Giuliano de Kappa Vu, presint cui libris, e soredut, che il libri, peraule di Ostîr e di chei che a jerin ae serade e lu vevin za let, al merete di jessi gjoldût.

Insome… il spetacul aromai al è rodât, e o sperìn propite di vê ocasion di riproponilu di cualchi altre bande… Se o vês voie… sin ca!