Tal ôr de cite e de vite

ll pari al è daûr a frizi cartufulis, e al môf la fresorie cun braùre.
– i vegnin buinis come simpri Pupà, za si sa dal profum.
– E tu âs di tignî di cont che no je la midiesime fersorie di simpri. – al dîs, inrabiât. – O volarès cjapâ chei che mi doprin lis fersoriis e lis citis.
– Ma ce disistu Pupà? O soi nome jo che o ven a vioditi.
– O soi sigûr, tantis voltis lis cjati sporcjis e jo no lis ai dopradis.
Gabriela e suspire e e dîs: – Pari, ti ricuardistu di cjapâ lis pirulis?
– Sì po, sì. – al dîs cun fastidi. – Ma jo no finìs di capî parcè cetante medisine.
– Par no dismenteâti di lavâ e resentâ lis citis e di no tacâ a vê fantasiis de int che e jentre par doprâlis, par esempli. E man man che tu fasis cure di no saltâ lis midisinis tu podaràs vivi come che ti plâs, di bessôl e libar.
Il pari al comede plats, tacis, une butilie di neri tal mieç de taule.
– E visiti di une volte che e je nome un tai par past. Cheste e je za a metât e te ai puartade îr l’altri.
Gabriela e zire il cjâf e si ferme intune foto di so pari zovin, daûr a judâle cui compits di scuele. Si volte a cjalâlu intant che al dopre la fertaie. Ancje lui al è daûr a cjalâ la imagjin, al à une voglade dolce ma pierdude.
La fie e dîs che i covente di lâ tal bagn. E scuen di calmâsi, no vûl rompi intune vaiude.
Cuant che e torne la cene e je te taule. Il pari al cjale fîs il so plat.
– Intal ultin timp o fâs siums cun to barbe. – al fâs trê bocons e i domande: – Cemût vadial Ricardo?
Gabriela i rispuint cence alçâ il cjâf : – Benon, cuntun grum di lavôr.
– Tu sês daûr a divorziâ, ise vere?
La muse di je si strassomee, e tartaie.
– O.. o… sin avonde… mâl, ce… cemût ti sêstu visât?
– Tu âs cussì la muse tant che chê di to barbe cuant che mal à dit dal so, cence alcâ la voglade dal plat.
Gabriela i cjape fuart la man, e respire a fonts par no vaî. I voi dal pari a tornin a pierdisi.
– Cuant che mi puartis a Ricardut par zuiâ e cjoli la mirinde, e sarà une buine ocasion par cirî lis citis che mi àn platât.