Autonomie e libertât

Un trop di gjalinis di un pulinâr impuartant a deciderin di ribelâsi cuintri il sisteme. Cussì a fondarin un moviment di emancipazion cence precedents. Tal imprin si faserin une mude compagne, par ricognossisi che a formavin part di cheste clape dal non “Autonomie e Libertât”.
Il statût al diseve clâr e tont che a jerin stufis e strachis che par sei  gjalinis a dovevin simpri sotstâ e sopuartâ lis angariis dai sorestants, tant di difûr, come dal didentri dal pulinâr. E a continuavin disint… – baste di scugnî fâ dome ûfs, par po dopo covâju e par po dopo tirâ sù i poleçuts fintremai che a laran vie pe lôr strade. –
Une altre lagnance e jere che sot sere, une volte rimpinadis  sore la gridele a polsâ, il vecjo gjal che al voleve durmî, lis cridave pai lôr cisicheçs, lui nol capive che a vevin bisugne di contâsi i fats de zornade. Une dì, no lu vioderin plui, ma a rivarin a savê che lu vevin metût intune cjase di ricovar.
A chest pont al rivà un gjal de cjalade sbire e sveade, la creste e il gosop colorâts come i fondacj de puinte. Subit a rivarin gnovis ordenancis e gnûfs oraris, il pulinâr al someave une caserme ai ordins di un tiran, che cui siei chichirichis matutins e no dome, no lis lassave in pâs dulinvie la zornade.
Un paragraf statutari in nerut, al diseve che… – lis aderentis a àn la plene facoltât di sielzisi il compagn di vite a lôr plasiment. – Cun chescj argoments a jentravin cocodeant in ducj i pulinârs in cercje di adesions. No dutis a jerin dacuardi, za che a volevin lâ indevant cul status di simpri: fâ ûfs, clucî e  cochedâ tirant sù i poleçuts.
In ducj i câs si discutive e si decideve, convertint aes gjalinis in sogjets atîfs, che a cuistionavin la societât, a lôr stessis e al mont intîr. Ogni tant aes aderentis si les viodeve mo ca mo là puartant dai strissons cun la scrite  “Autonomie e Libertât”.

di Galliano di Buenos Aires
#1***