Il cavalîr

Lis lezions di chel costôs cors di informatiche a jerin intune aule di un famôs istitût tecnic de citât.
Finide la lezion, ta chê sabide, ai 27 di Avrîl 1985, jê mi veve domandât un passaç fin a la stazion dai trens. Cussì le vevi fate jentrâ inte mê Fiat 124 colôr… colôr?
Cocule? Un colôr assurt di mode ta chei agns, o miôr, prime. La machine, di seconde man, e veve ancjemò une etichete adesive “Socio ACI 1971-72”. Poltronis che no si podevin sbassâ. Pomul dal cambi in… bachelite? Buh?
La mê compagne di cors e jere bielonone. E varès podût di sigûr concori a Miss Italia. Alte, secje, cuel di cesen; cjavei in stîl “dark” castagns, cotonâts. Cordiâl. No si pavonave.
Rivât al Birrificio Moretti, in Plaçâl 26 di Lui, o provai a cjalâ a man drete par capî se a rivassin altris machinis ma la sô alte cise e jere un pidiment.
Jê e rideve, si cjapave in zîr e e sbassave il cjâf.

Le viodei pocjis altris voltis.

Inte vierte dal 1986 le notai a une sagre insiemi a un biel fantat vistût di mode, cjavei cul gel e spolvarin: al sameave un dai Duran Duran. Jo no olsai nancje rivâi dongje par saludâle, fasint fente di no viodile e jê no si inacuarzè nancje di me.

di Checo Tam
#1***

1 comments On Il cavalîr

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît