CorseCurteDicembar#08 – In blanc e frêt

#08 – In blanc e frêt

Ti jeris restade lontane, scuindude. Lu sai cumò. Platade intun piçul cjanton dal gno cjâf (o cûr?), e che nuie indevant al podarâ fâ che ti gjavi fûr da gno pinsîrs cumò che o soi da bessôl.
O crodevi propit di veti dismenteade. Che al jere stât nome un zûc nassût di une grande stufe. Ma la sorte mi a fât tornâ a lis midiesimis hotel e stanzie di vincj agns indaûr:
La nêf e colave di oris. E jo o continuavi a cjalâ chê femine dal barcon indevant come che prime sere, cuatri dîs indaûr, che o jeri rivât. Jê e lave e vignive, a voltis cun il complet di vore, altris cuntun grumâl e une cotule-bregon. O come chê ultime gnot che e jere involuçade intun suieman che al rivelave la sô siluette e disgredantsi i cjavei umits cuntune man e tignint il celulâr cun chê altre.
O ai vierzût un tichininin il veri dal barcon, e o ai lass
ât che la palme de mê man si jemplàs di flocuts, fin che si formave un piçul grumut. Le ai vioudude passâ une altre volte, fûr puartade, indiferent. O ai sierât la man cun vivôr e cuissà… rabie. Daspò o butai con fuarce chel balon blanc che e à batût il vieri di je e mi soi platât disot da la basse di barcon cjalant cidin cence movimi.

Jê si svicinà e e vierzè la ante. O ai podût dâ une lungje voglade a chei voi profonts e unics. Nome un secont prime che jê e tornàs a la sô rutine di lá e vignî cul telefonin.
O tornai a ripeti la operazion dôs voltis in plui. La ultime i voi a jerin traviersâts dal rebus al fastidi. Mi soi butât tal jet, o clamai par dâ la buine gnot ae mê femine e ai miei fiis e par dii che il zîr di afârs al jere finît e che o sarès a cjase doman di sere. O ricuardi di jessimi indurmidît cjalant par li barcon colâ la nêf e insumiantmi cun chei voi.
Sieri la puarte e o cjali viers il barcon ancje prime di molâ la valîs a plan tiere. Un frut al passe corint e di un altre bande si sint la vôs di un om.
Mi distiri tal jet, o sieri i voi e o ciri intai chei lontans seconts di felicitât disfats come i flocs al soreli.

di Zorz Cesaratto ( Vecjo Claes)
#1441

1 comment