CorseCurteDicembar#04 – Une neveade vie pe gnot

#04 – Une neveade vie pe gnot

Cuissà parcè, vuê di matine mi soi dismot un pôc plui tart dal solit. Va ben che e je domenie, ma no sint tancj rumôrs di fûr, e ancje se lis tendis de cjamare a son tiradis, mi somee che la zornade e sedi propit grise. Però e à une lûs strane, vive.
O pensi che se al plûf o dovarai rinunziâ di fâ une biele cjaminade par lâ a messe, e mi tocjarâ, come ogni dì, meti in moto la mê trapulute. O voi in cusine, ancjemò mieç indurmidît, par bevi cu la calme il gno sant cafitut. Ma intal moment di meti in bocje la cjicarute cjalde o cjali di fûr e o resti imbambinît: al nevee!
O tiri sù ancje la persiane de puarte che e dà su la terace e mi si jemplin i voi di chel grant spetacul de nature: cidine cidine, cuntun floc daûr chel altri, in pôc timp e à savût cambiâ il colôr di dut ce che e cjatave sot di jê. E e à di vê neveât par dute la gnot, cjalant dal alt e di lontan lis monts, i cjamps, lis cjasis, i arbui, i fîi de lûs: al è propit dut blanc… O fâs il zîr di ducj i barcons di cjase, par no pierdimi nissun di chei ingropaments cussì dolçs che ti da la nêf, specialmentri cuant che si le cjale cui voi di un frut.
Mi impensi che o dovarai scovâ ben i cuadrei de stradute intal nestri zardin, che nol sbrissi cualchidun, e netâ in ordin il passaç par tirâ fûr la machine. Naturalmentri a saran ancje lis cjadenis di meti sù, par no vê fastidis. A proposit, dulà lis varaio lassadis? E doman si scugnarà di sigûr vuidâ cuntun grum di atenzion pe strade, biel che o larai a vore…
Come une calamite mi ven subit iniment la sene dal gno ultin incident cu la auto, propit cuant che al veve neveât; il ritart sul lavôr, lis rognis cu la assicurazion, i tancj bêçs par comedâ i dams e jo rabjôs fin a vonde. E dut par cuatri flocs di nêf… E cussì chel sens di serenitât di prime si è cumò cambiât in baticûr! Ma fasinsi coragjo, dai, e anìn indenant!
Mi lavi e mi cambii a la svelte e o voi fûr. O soi masse curiôs di scuvierzi miôr il nestri biel paisut, specialmentri vuê di matine, che il Signôr al à volût vistîlu dome di blanc… A pene che o vierç il puartoncin, o resti come inceât di tant lusôr e mi maravei ancjemò de tante nêf che si à ingrumade par dut. Mi pâr di tornâ indaûr cui agns, e come un frut o voi a sgarfâle cu lis mans e a cerçâle, cuasi come che al fos il citrât di une volte…
Tal mieç dal zardin condominiâl, cumò e je za fieste grande par dute la mularie: difat a stan fasint sù, cun chês piçulis manutis, une biele sacume di nêf, ben fracade e slisse. Une frute e à vût di sô mari une carote par fâi il nâs e une scovate vecje; e dal nono une barete scure e un pâr di ocjai. Par ultin a saltin fûr ancje cuatri botons neris pal capot: fra pôc il gnûf guardian dal zardin al sarà pront par jentrâ in ativitât… Mancumâl che nol mangje e che al lavore a gratis…
Mi fâs tant plasê a viodi che i cuadrei de stradute dal zardin a son za stâts netâts, e biel che o ziri la muse, mi rive un balon di nêf propit sul cjâf. O sint ridadis di lontan: al è gno fi, che si è jevât prime di me e che al à za fat ducj i lavôrs di spaladôr… Ce che al vuel dî vê brâfs fruts…
Alore no pues fâ di mancul di ringraciâlu, ma o scugni cori vie subit par no cjapâmi une altre lavade di robe inglaçade inte muse…
E cumò che o soi avonde solevât, mi metarai sù i scarpons cul pêl, par lâ a messe; magari a chê des undis, cussì o varai plui timp di cjalâ ator par dut e ancje di bevimi un cafè in place cui amîs.
Intal fratimp al à finît di neveâ. La strade e je cumò dute un pacjuc. E ce brute che e je la nêf sporcje! O cjamini pal marcjepît, ma o fâs apueste a pestâ chê nêf biele frescje, par sintî chel rumôr sort e particolâr di cuant che e ven tibiade sot dai scarpons, e dopo mi ziri a cjalâ la forme che e à lassât daûr di me, cui taps del suelis.
Mi divertìs a spacotâ lis ramacis dai arbui lunc il viâl, par amirâ dutis chês balutis blancjis cussì picininis, che intun nûl lizêr a colin a planc a planc par tiere. Mi met a fâ une bale un pôc bocone e le fâs rodolâ lontan, par viodi il segn che e lasse biel che e côr, e come che e devente simpri plui gruesse… Al è propit tornât fûr il frut che al è dentri di me… Ma ce spetacul che e je la nature cu la nêf!

di ***
#1***