La surtide di Grediscje

Rizart di Strassolt al è cetant preocupât par la iniziative di Denêl Francol che al è lât fûr di Grediscje, cun i siei soldâts, par fâ dai furniments intai cjamps ator de fuartece. Cuant che al viôt rivâ i cavalîrs cun arcabûs vuidâts da Denêl Antoniins al berle plui che al po al Francol di tornâ dentri dai mûrs ma chel, jessint plui vieli, a nol vûl ubidîi. Alore il Strassolt al monte a cjaval cence nancje leâsi le armadure e al cor fûr. L’Antoniins al viôt che i austriacs a son parâts dentri di un fossâl che al fâs lôr come di trincee, alore al ordene ai siei di ritirâsi. I austriacs, viodint la ritirade dai cavalîrs a jessin dal fossâl par corii daûr, a chest pont l’Antoniins al ordene ai siei di tornâ indaûr e tacâ i nemiis scuvierts. Di colp i fants austriacs a si cjatin scuvierts cun i cavalîrs furlans che a scjariin su di lôr i colps dai lôr arcabûs e pistolis a ruede. Rizart di Strassolt al è colât dal cjaval e al sta par jessi cjapât da doi fants sclâfs, la sô salvece e je che il cjaval i torne indaûr, cuntun sfuarç disperât al rive a colpî doi venezians: un cun la spade, chel altri cu la pistole, a montâ sul cjaval e tornâ dentri. Intant, il Francol e chei altris cun lui a si son rindûts ai furlans. A chest pont al rive ancje Pompeo Giustiniani, il comandant di dutis lis fuarcis venezianis
«Biel lavôr Missâr Antoniins».
«Graciis missâr», i rispuint il nobil furlan, ma subit dopo, il comandant gjenovês, veteran da la vuere da lis Flandris, al sorprent ducj cuntun ordin trement: «Cumò o vês di copâ ducj i presonîrs».
«Cemût, parcè?»
L’Antoniins al veve amirazion par il famôs veteran che al comandave l’esercit e nol rivave a crodi a un ordin cussì crudêl. Alore chel altri al zonte: «In cheste situazion a puedin jessi judâts di chei dentri de citât e ben no vin di cjapâ presonîrs ma copâju ducj».
Denêl Antoniins a nol podeve fâ nuie intant che ducj i austriacs, nobii e popolans, a vignivin passâts a fîl di lame e tant mancul a podevin Rizart di Strassolt e chei di Grediscje che a viodevin dal alt dai mûrs la orende stragje.

di Luche Bagnarol

#1***

Liberementri trat da:
PRELLI ALBERTO, Palma e Gradisca in Guerra, soldati e battaglie in Friuli 1615 – 1617, Edizioni del Confine, 2017, Udine. P. 41.