CorseCurteOtubar#18 – Gusielis

#18 – Gusielis

Cuant che il Creatôr al à fat lis pôris, al à di sigure metût al prin puest la pôre des gusielis!
Intindintsi. Dutis lis pôris a fasin pôre. La pôre dal scûr, la pôre dal boborosso, la pôre de altece, o pûr chê dal vueit. Dutis legjitimis. Ma la pôre des gusielis e je la piês!
Cui di voaltris di piçul no si è mai platât ta cantine par no lâ tal ambulatori a fâ la vacine? Salacôr dopo vê sumiât la gnot prime la gusiele dal punturon che ti sbusave la spale fûr par fûr?
E cui nol à mai zirât il cjâf di chê altre bande par no cjalâ il pari o il barbe che par gjavâ une sclese di len jentrade tal dêt, al doprave une gusiele, prime ben vongolade tal fûc?
E disêtmi. Cui di voaltris, tal ospedâl par lis analisis dal sanc, nol à mai smicjât la infermiere tai voi, fasint il figo? Nol jere coragjo chel. No volevis cjalâ il braç cu la gusiele in picjulon, intant che chê altre e travasave cence remission!
Dome a pensâ, mi scaturìs dentri une pôre mostre.
Ma ce volêso. Mi capitin simpri chescj lambics cuant che o soi distirât suntun jetut. Come cumò, dal gno dentist, prin di vierzi la bocje e prin che la lûs di dîs mil watts mi vignedi pontade tai voi. Mi somee propit di jessi tal studi di un psicolic, dulà che si bute fûr dut ce che si à dentri.
— Eco, fasin un pocje di anestesie. — Al dîs il dentist.
E mi ven dongje messedant par aiar une siringje strambe cun doi anei, e su la spice un gusielon lunc une cuarte.
— Che al lassi, dotôr. — O rispuint svelt. — O sopuarti cun gran plasê!

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît